साँस्कृतिक र राष्ट्रिय महत्वका चलचित्रलाई साढे तीन करोड अनुदान, कार्यविधिमाथि छलफल

काठमाडौँ:  सरकारले सांस्कृतिक तथा राष्ट्रिय महत्वका विषयमा आधारित चलचित्र निर्माणलाई प्रोत्साहन गर्न चालु आर्थिक वर्षका लागि ३ करोड ५० लाख अनुदान दिने तयारी गरेको छ । त्यसका लागि तयार गरिएको कार्यविधिको मस्यौदामाथि सोमबार सरोकारवालासँग छलफल गरिएको हो ।

सूचना तथा सञ्चारमन्त्री डा. विक्रम तिमिल्सिनाले अनुदान वितरण प्रक्रिया पारदर्शी, प्रभावकारी र कार्यान्वयनयोग्य बनाउन स्पष्ट कार्यविधि आवश्यक रहेको बताए । उनले सरकारी लगानीबाट बन्ने चलचित्रले नेपालको इतिहास, संस्कृति, राष्ट्रिय पहिचान र सामाजिक यथार्थलाई सशक्त रूपमा प्रस्तुत गर्नुपर्ने धारणा राखे ।

छलफलमा सहभागी चलचित्रकर्मीहरूले सरकारको अनुदान नीति सकारात्मक रहेको उल्लेख गर्दै अनुदान वितरणका लागि स्पष्ट, निष्पक्ष र वस्तुगत मापदण्ड बनाउनुपर्ने सुझाव दिएका छन् । उनीहरूले नयाँ तथा उदीयमान चलचित्रकर्मीलाई प्राथमिकता दिनुपर्नेमा पनि जोड दिएका छन् ।

मन्त्रालयका अनुसार सरोकारवालाबाट प्राप्त सुझाव समेटेर कार्यविधिलाई अन्तिम रूप दिइनेछ। कार्यविधि स्वीकृत भएपछि सांस्कृतिक तथा राष्ट्रिय महत्वका उत्कृष्ट चलचित्र निर्माणका लागि अनुदान वितरण गरिनेछ।