जेनजी आन्दोलनको उपलब्धि आखिर कसको हातमा पुग्यो ? शङ्कर पोखरेलले उठाए गम्भीर प्रश्न

काठमाडौँ : नेकपा (एमाले) का महासचिव शङ्कर पोखरेलले जेनजी आन्दोलनको नेतृत्व, त्यसबाट प्राप्त उपलब्धिको स्वामित्व र वर्तमान सरकारको कार्यशैलीमाथि गम्भीर प्रश्न उठाएका छन् ।

पोखरेलले जेनजी पुस्ताले स्थगित गरेको आन्दोलन त्यसपछि टीओबी समूहले कब्जा गरेको दाबी गर्दै आन्दोलनको वास्तविक नेतृत्व र त्यसपछिका राजनीतिक घटनाक्रमबारे निष्पक्ष समीक्षा हुनुपर्ने बताएका छन् । जेनजी आन्दोलनबाट प्राप्त उपलब्धि आखिर कसको हातमा पुग्यो भन्ने विषय स्पष्ट हुनुपर्ने उनको धारणा छ ।

आन्दोलनका क्रममा प्रयोग भएका रासायनिक पदार्थको स्रोत, प्रयोगको उद्देश्य तथा त्यसमा संलग्न पक्षबारे पनि उनले प्रश्न उठाएका छन् । जेनजी युवाको नाममा भएको आन्दोलनको राजनीतिक स्वामित्व कसले लियो भन्ने विषयमा तथ्यपरक अनुसन्धान आवश्यक रहेको पोखरेलको भनाइ छ ।

त्यस्तै, उनले प्रधानमन्त्री बालेन्द्र शाहको कार्यशैली र सरकारको लोकतान्त्रिक जवाफदेहितामाथि पनि प्रश्न गरेका छन् । लोकतान्त्रिक व्यवस्थामा प्रधानमन्त्री संसद्प्रति उत्तरदायी हुनुपर्ने उल्लेख गर्दै उनले सरकार र राजनीतिक दलबीच संवाद तथा सहकार्य आवश्यक रहेको बताएका छन् । प्रधानमन्त्रीको संवादहीनताप्रति समेत उनले असन्तुष्टि जनाएका छन् ।

इनाम सकोटाको मोबाइल फोन प्रधानमन्त्री कार्यालयमा रहेको र त्यससँग सम्बन्धित प्रमाण नष्ट गरिएको भन्ने चर्चाबारे पनि पोखरेलले प्रश्न उठाएका छन् । मोबाइल प्रधानमन्त्री कार्यालयसम्म कसरी पुग्यो, त्यसमा रहेका प्रमाणको अवस्था के छ र प्रमाण नष्ट भएको भए त्यसका लागि को जिम्मेवार छ भन्ने विषयमा निष्पक्ष अनुसन्धान हुनुपर्ने उनको भनाइ छ ।

आन्दोलनको नाममा सत्ता प्राप्त गरे पनि लोकतान्त्रिक उत्तरदायित्वबाट उन्मुक्ति पाउन नसकिने पोखरेलको तर्क छ । सरकार जनताप्रति, प्रधानमन्त्री संसद्प्रति तथा राज्यका निकाय संविधान र कानुनप्रति जवाफदेही हुनुपर्ने उनले बताएका छन् ।

जेनजी आन्दोलनले उठाएका सुशासन, पारदर्शिता र जवाफदेहिताका मुद्दा वर्तमान अवस्थामा कति सम्बोधन भए भन्ने विषयमा गम्भीर समीक्षा आवश्यक रहेको पोखरेलको धारणा छ । आन्दोलनको उपलब्धि कसको हातमा पुग्यो भन्ने प्रश्नको जवाफ आरोप–प्रत्यारोपबाट नभई निष्पक्ष छानबिन र तथ्यका आधारमा खोजिनुपर्ने उनको भनाइ छ ।