पद खोसिएपछि दानबहादुर कार्की सर्वोच्चमा, पुनर्वहालीको माग

काठमाडौं : बुधबार नेपाल प्रहरीको महानिरीक्षक (आईजीपी) पदबाट हटाइएका दानबहादुर कार्की पुनर्वहालीको माग गर्दै सर्वोच्च अदालत जाने तयारीमा छन् ।

कार्की निकट एक कानुन व्यवसायीका अनुसार बहालवाला प्रहरी कर्मचारीलाई उचित आधारबिना जिम्मेवारीबाट हटाउनु प्रहरी ऐनविपरीत भएको दाबी गर्दै सर्वोच्चमा रिट निवेदन दायर गर्न लागिएको हो ।

रिटमा प्रहरी ऐन, २०१२ र प्रहरी नियमावली, २०७१ मा रहेको व्यवस्थाअनुसार कार्कीलाई पदबाट हटाउने आधार नरहेको जिकिर गरिएको छ । प्रहरी महानिरीक्षकको सेवा अवधि, पदावधि र उमेर हदसम्बन्धी प्रावधानले समेत उनलाई तत्काल पदमुक्त गर्न नमिल्ने दाबी रिटमा गरिने बताइएको छ ।

कार्की २०५४ चैत १८ गते नेपाल प्रहरी सेवामा प्रवेश गरेका थिए । प्रहरी नियमावलीअनुसार महानिरीक्षकको सेवा अवधि ३० वर्ष र उमेर हद ५८ वर्ष रहेको छ । २०२९ साउन १५ गते जन्मिएका कार्की हाल ५४ वर्षका छन् । महानिरीक्षकको कार्यकाल चार वर्ष तोकिएको छ भने उनी आईजीपी नियुक्त भएको आगामी कात्तिक २७ गते एक वर्ष पुग्नेछ ।

कार्कीको पक्षबाट सर्वोच्चमा हुने बहसका लागि नेपाल बार एसोसिएसनका अध्यक्ष विजय मिश्र, वरिष्ठ अधिवक्ता भीमार्जुन आचार्य र गोविन्द बन्दीसहितका कानुन व्यवसायी सहभागी हुने तयारी रहेको बताइएको छ ।