माथिल्लो तामाकोशीबाट विद्युत् उत्पादन सुरु

दोलखा जिल्लामा अवस्थित ४५६ मेगावाटको माथिल्लो तामाकोशी जलविद्युत केन्द्रबाट आंशिक रुपमा विद्युत् उत्पादन सुरु भएको छ। यो नेपालमा सञ्चालित जलबिधुत गृहमध्ये सबैभन्दा ठुलो बिधुत आयोजना हो ।

असोज ११ र १२ गतेको अविरल वर्षाका कारण आएको बाढी र पहिरोले बिधुत गृहलाई क्षति पुर्‍याएको थियो।  क्षति पुर्‍याएका संरचनाहरूको आंशिक मर्मतसम्भार गरी ८८ दिनपछि आज मंगलबार बेलुका ७.४० बजेबाट पुनः विद्युत् उत्पादन सुरु गरी राष्ट्रिय प्रसारण प्रणालीमा जोडिएको छ। हाल नदीमा उपलब्ध पानीको बहावलाई पूर्ण रुपमा प्रयोग गरी १२० मेगावाट विद्युत् उत्पादन गरिएको छ।

असोज १२ गतेको पहिरोले बाँधस्थलभन्दा केही तल दायाँतर्फ रहेका नियन्त्रण कक्ष (कन्ट्रोल रुम) भवन, बालुवा थिग्ग्रयाउने पोखरी (डिस्याण्डर) र बाँधबाट डिस्याण्डरसम्म पानी पुर्याउने भूमिगत नहर (कल्भर्ट)मा क्षति पुर्‍याएको थियो।