टिकट वितरणप्रति योगेश भट्टराईको असन्तुष्टि, ओलीलाई निर्णय सच्याउन आग्रह

काठमाडौँ: नेकपा एमालेका उपमहासचिव योगेश भट्टराईले पार्टीको टिकट वितरणलाई लिएर सार्वजनिक रुपमा असन्तुष्टि जनाएका छन्। 

सोमबार सामाजिक सञ्जालमार्फत एक भिडियो सार्वजनिक गर्दै उनले अध्यक्ष केपी शर्मा ओलीलाई ‘विशाल छाती’ बनाएर केही क्षेत्रको टिकट हेरफेर गर्न आग्रह गरेका हुन्।

भट्टराईले महाधिवेशनमा आफूलाई सहयोग गरे/नगरेको भन्दा पनि पार्टीको हित र स्थानीय कार्यकर्ताको भावना बुझेर टिकट वितरणलाई न्यायोचित बनाउन सुझाव दिए। कतिपय ठाउँमा अन्याय भएको गुनासो आएको उल्लेख गर्दै उनले भएका कमजोरी सच्याउन अध्यक्ष ओलीलाई अपिल गरे।

उनले भने, ‘देशका ७–८ वटा निर्वाचन क्षेत्रमा पार्टी कमजोर हुने आशंका देखिएको छ। तपाईँ पार्टीको सम्मानित नेता हो, त्यसैले विशाल छाती बनाउनुस्। अहिले एमालेको जित नै हाम्रो मुख्य मिसन हुनुपर्छ।’ ओलीले आफूसँग फरक मत राख्ने नेताहरूको टिकट खोसेको सन्दर्भमा भट्टराईले आफूलाई व्यक्तिगत रुपमा केही नचाहिएको तर कमजोरी सच्याउनुपर्ने बताए।

उनले कार्यकर्ताहरूलाई टिकटको असन्तुष्टि छाडेर पार्टी जिताउन आह्वानसमेत गरे। भोलि ६ गते १६५ वटै निर्वाचन क्षेत्रमा हुने मनोनयन दर्ता कार्यक्रममा उत्साहपूर्वक सहभागी हुन आग्रह गर्दै भट्टराईले आफू ताप्लेजुङमा रहने जानकारी दिए।