सुनचाँदीका सिक्का खरिद गर्न ग्राहकको भीड

 काठमाडौं : तिहार नजिकिएसँगै नेपाल राष्ट्र बैंकबाट सुनचाँदीका सिक्का खरिद गर्ने उपभोक्ताको भीड लागेको छ । बबरमहलस्थित राष्ट्र बैंकको टक्सार महाशाखामा सिक्का किन्न चाहनेहरूको बिहानैदेखि लामो लाइन लागेको हो ।

राष्ट्र बैंकले तिहारलाई लक्षित गर्दै आज बिहान ११ बजेदेखि दिउँसो ३ बजेसम्म सुन तथा चाँदीका सिक्का बिक्री सुरु गरेको छ । सिक्का बिक्री आज र भोलि गरी दुई दिनसम्म सञ्चालन हुनेछ ।

तिहारमा सुनचाँदीका सिक्का तथा धातु खरिद गरी लक्ष्मीका रूपमा पूजा गर्दा शुभ हुने धार्मिक विश्वासका कारण उपभोक्ताको आकर्षण बढेको हो । राष्ट्र बैंकबाट बिक्री हुने सिक्काको शुद्धतामा विश्वास गर्ने भएकाले पनि सर्वसाधारण खरिदका लागि पुग्ने गरेका छन् ।

गत वर्ष सुनको अभाव देखाउँदै राष्ट्र बैंकले चाँदीका सिक्का मात्रै बिक्री गरेको थियो । तर यस वर्ष वाणिज्य बैंकबाट ३५ किलो सुन खरिद गरी सुनका असर्फीसमेत बिक्रीमा राखिएको छ ।

राष्ट्र बैंकका अनुसार एक व्यक्तिले २.५ ग्राम तौलको एउटा सुनको असर्फी र १० ग्राम तौलका बढीमा तीनवटासम्म चाँदीका सिक्का खरिद गर्न सक्नेछन् ।

सुनचाँदीको मूल्यमा वृद्धि

यस वर्ष सुनचाँदीका सिक्का खरिद गर्दा उपभोक्ताले बढ्दो मूल्यको सामना गर्नुपर्ने भएको छ । आज सुनको मूल्य प्रतितोला १३ हजार ३०० रुपैयाँले बढेर २ लाख ८८ हजार ९०० रुपैयाँ पुगेको छ ।

त्यसैगरी चाँदीको मूल्य पनि प्रतितोला २६५ रुपैयाँले बढेर ३ हजार ९२० रुपैयाँ पुगेको छ । राष्ट्र बैंकले सोही दिनको बजार मूल्यका आधारमा सिक्काको मूल्य निर्धारण गर्ने र त्यसमा उत्पादन खर्चसमेत जोडेर बिक्री गर्ने जनाएको छ ।

सिक्का खरिद गर्न चाहनेले नेपाली नागरिकता, राष्ट्रिय परिचयपत्र वा नम्बर खुलेको अन्य परिचयपत्रको प्रतिलिपिसहित स्वयं उपस्थित हुनुपर्नेछ । खरिदकर्ताले नगद वा क्यूआरमार्फत भुक्तानी गर्न सक्ने व्यवस्था गरिएको राष्ट्र बैंकले जनाएको छ ।