ग्यास सिलिन्डरको तौल परिवर्तन गर्न उद्योगीले मागे दुई वर्ष

काठमाडौं : नेपाल आयल निगमले ग्यासको दोहोरो मूल्य प्रणाली लागू गर्ने तयारी गरिरहेका बेला नेपाल एलपी ग्यास उद्योग संघले आफ्नो औपचारिक धारणा सार्वजनिक गरेको छ ।

 संघले फरक तौलका सिलिन्डर तत्काल बजारमा ल्याउन नसकिने भन्दै तयारीका लागि कम्तीमा दुई वर्षको समय माग गरेको छ ।

निगमले व्यावसायिक प्रयोजनका लागि छुट्टै तौलका सिलिन्डर प्रयोगमा ल्याउने र कुल ग्यासको ३० प्रतिशत व्यावसायिक प्रयोजनका लागि छुट्याउने प्रस्ताव गरेको थियो । उक्त प्रस्तावमाथि १३ कात्तिकमा भएको छलफलपछि सात दिनको समय पाएका उद्योगीले बिहीबार तीनबुँदे लिखित जवाफ निगमलाई बुझाएका हुन् ।

संघले हाल बजारमा प्रचलनमा रहेका १४.२ किलो क्षमताकै सिलिन्डरलाई रङका आधारमा छुट्याउन प्रस्ताव गरेको छ । जसअनुसार घरायसी प्रयोजनका लागि रातो र व्यावसायिक प्रयोजनका लागि निलो सिलिन्डर प्रयोग गर्नुपर्ने संघको सुझाव छ ।

संघका अध्यक्ष दिवान चन्दले बजारमा रहेका सिलिन्डर तत्काल विस्थापित गर्दा उद्योगीलाई ठूलो आर्थिक भार पर्ने र व्यवस्थापनमा समेत समस्या हुने बताएका छन् । सरकारले फरक तौलका सिलिन्डर नै लागू गर्ने अडान लिए उद्योगहरूलाई तयारीका लागि कम्तीमा दुई वर्षको समय दिनुपर्ने उनको भनाइ छ ।

त्यस्तै, निगमले प्रस्ताव गरेको ३० प्रतिशत व्यावसायिक कोटाको सट्टा हाललाई १० प्रतिशत मात्र ग्यास व्यावसायिक प्रयोजनका लागि छुट्याउन संघले माग गरेको छ । बजारको अवस्था हेरेर भविष्यमा उक्त कोटा थपघट गर्न सकिने संघको धारणा छ ।

अनुदान प्रणालीका सम्बन्धमा संघले ग्यास परल मूल्यमै बिक्री गरी लक्षित वर्गलाई मात्र वाणिज्य बैंकमार्फत अनुदान उपलब्ध गराउनुपर्ने प्रस्ताव गरेको छ । यसो गर्दा अनुदान पाउनुपर्ने वर्गले प्रत्यक्ष लाभ लिन सक्ने संघको भनाइ छ ।

यसैगरी, संघले २० फागुन २०८१ मा निगम र संघबीच भएको सम्झौता कार्यान्वयन गर्न पनि ध्यानाकर्षण गराएको छ । तत्कालीन वाणिज्य तथा आपूर्ति सचिव एवं निगम सञ्चालक समिति अध्यक्ष गोविन्दबहादुर कार्कीको उपस्थितिमा भएको सहमतिको बुँदा नम्बर ३ अनुसार मुनाफालाई प्रतिशतमा कायम गर्ने व्यवस्था शीघ्र कार्यान्वयन गर्न उद्योगीले माग गरेका छन् ।