प्रधानमन्त्री बालेन शाह र भारतीय विदेश सचिव मिश्रीबीच शिष्टाचार भेटवार्ता

काठमाडौं: नेपाल भ्रमणमा रहेका भारतीय विदेश सचिव विक्रम मिश्रीले बिहीवार बिहान प्रधानमन्त्री बालेन शाहसँग सिंहदरबारस्थित प्रधानमन्त्री तथा मन्त्रिपरिषद्को कार्यालयमा शिष्टाचार भेटवार्ता गरेका छन्।

भेटका क्रममा नेपाल–भारतबीचको ऐतिहासिक द्विपक्षीय सम्बन्धलाई थप सुदृढ बनाउने तथा आपसी सहकार्य विस्तार गर्ने विषयमा छलफल भएको छ।

दुई दिने औपचारिक भ्रमणका लागि बुधवार काठमाडौं आइपुगेका विदेश सचिव मिश्रीले आफ्नो उच्चस्तरीय भेटघाटलाई निरन्तरता दिएका हुन्। प्रधानमन्त्री शाहसँगको भेटमा उनले भारत सरकारका तर्फबाट नेपालको विकास र समृद्धिका लागि निरन्तर सहयोग र सहकार्य गर्ने प्रतिबद्धता व्यक्त गरेका छन्।

प्रधानमन्त्रीको सचिवालयका अनुसार भेटमा दुई देशबीचको आपसी हित, कनेक्टिभिटी, व्यापार तथा सांस्कृतिक सम्बन्धका विभिन्न पक्षमा सकारात्मक छलफल भएको थियो।

भारतीय विदेश सचिवको यस भ्रमणलाई कूटनीतिक दृष्टिले महत्वपूर्ण मानिएको छ। दुई देशबीचका बाँकी द्विपक्षीय विषयमा समझदारी कायम गर्न तथा उच्च तहमा निरन्तर संवाद र सहकार्य अघि बढाउन यस्ता भ्रमणले महत्वपूर्ण भूमिका खेल्ने कूटनीतिक क्षेत्रका जानकारहरूको बुझाइ छ।