गगन थापाको पक्राउबारे राणाको चेतावनी– ‘कांग्रेस चुप लागेर बस्दैन’

काठमाडौं : नेपाली कांग्रेसका महामन्त्री उदयशमशेर राणाले पार्टी सभापति गगन थापालाई पक्राउ गर्ने प्रयास भए कांग्रेस चुप लागेर नबस्ने चेतावनी दिएका छन् ।

ललितपुरको बज्रबाराहीमा आयोजित सरसफाइ तथा फूल रोप्ने कार्यक्रममा बोल्दै महामन्त्री राणाले सभापति थापाविरुद्ध सरकारले प्रतिशोधपूर्ण कदम चाल्न खोजे त्यसको सशक्त प्रतिवाद गर्ने बताएका हुन् ।

उनले सरकारले सभापति थापामाथि कुनै पनि गलत कदम चाले कांग्रेसले त्यसलाई सहेर नबस्ने स्पष्ट पारे । ‘सभापति थापामाथि सरकारले कुनै पनि गलत कदम चाल्यो भने कांग्रेस टुलुटुलु हेरेर बस्दैन। त्यस्तो कदमको दृढतापूर्वक प्रतिरोध गर्छौँ,’ उनले भने ।

बिचौलिया इनाम सापकोटाको बयानलाई आधार बनाएर सभापति थापालाई पक्राउ गर्ने प्रयास भइरहेको राणाको दाबी छ । सरकारले प्रतिशोधपूर्ण कदम चाले त्यसविरुद्ध सशक्त रूपमा प्रतिरोध गर्न उनले पार्टीका नेता तथा कार्यकर्तालाई आह्वानसमेत गरेका छन् ।

महामन्त्री राणाले सरकारका पछिल्ला गतिविधि लोकतान्त्रिक मूल्य, विधिको शासन र नागरिक अधिकारविपरीत रहेको आरोप लगाए । साथै, उनले नेपाल प्रहरीका महानिरीक्षक दानबहादुर कार्कीलाई सरकारले गैरकानुनी रूपमा पदबाट हटाएको दाबीसमेत गरेका छन् ।