जापानमा मन्त्रिपरिषद् पुनर्गठन, ताकाइचीले हटाइन १८ मध्ये १० मन्त्री

एजेन्सी, ०१ असोज । जापानकी प्रधानमन्त्री साने ताकाइचीले आफ्नो पहिलो मन्त्रिपरिषद् पुनर्गठन गर्दै १८ मध्ये १० मन्त्री परिवर्तन गरेकी छन् ।

तर अर्थ, परराष्ट्र, रक्षा र वित्तजस्ता महत्वपूर्ण मन्त्रालयका मन्त्रीलाई निरन्तरता दिइएको छ । ताकाइचीले सन् २०२५ अक्टोबरमा प्रधानमन्त्री बनेपछि पहिलोपटक मन्त्रिपरिषद् पुनर्गठन गरेकी हुन् । पुनर्गठनमा आन्तरिक मामिला तथा सञ्चारमन्त्री योशिमासा हयाशीलाई हटाइएको छ भने जापान इनोभेसन पार्टीका हिरोसी नकात्सुकालाई मन्त्रिपरिषद्मा समेटिएको छ । उनी उक्त पार्टीबाट मन्त्रिपरिषद्मा सहभागी हुने पहिलो नेता बनेका छन् ।

ताकाइचीले परराष्ट्रमन्त्री तोसिमित्सु मोतेगी, रक्षामन्त्री सिन्जिरो कोइजुमी, अर्थमन्त्री सात्सुकी कटायामा र अर्थतन्त्रसम्बन्धी मन्त्री मिनोरु किउचीलाई निरन्तरता दिएकी छन् । उद्योगमन्त्री र्योसेइ अकाजावालाई पनि यथावत् राखिएको छ। महत्वपूर्ण मन्त्रालयमा निरन्तरता दिँदा आर्थिक तथा परराष्ट्र नीतिमा ठूलो परिवर्तन नहुने संकेत गरिएको छ ।

ताकाइची सरकारले महँगी नियन्त्रण, कमजोर येन, बढ्दो सरकारी ऋण र अमेरिकासँगको सम्बन्धलगायत विषयलाई प्राथमिकतामा राखेको छ । सरकारले खाद्य वस्तुमाथिको उपभोग कर घटाउने योजना अघि बढाइरहेको छ भने रक्षा क्षमतासमेत विस्तार गर्ने तयारी गरिरहेको छ ।

चीनसँगको सम्बन्ध, ताइवानसम्बन्धी सुरक्षा चासो तथा अमेरिकासँग रक्षा र लगानीका विषयमा बढ्दो समन्वय पनि जापान सरकारका प्रमुख चुनौतीका रूपमा छन् । सरकारले यस वर्षको अन्त्यसम्ममा राष्ट्रिय सुरक्षा तथा रक्षा नीतिसम्बन्धी प्रमुख दस्तावेज पुनरावलोकन गर्ने तयारी गरेको छ ।

मन्त्रिपरिषद् पुनर्गठनलाई ताकाइची नेतृत्वले सरकारको स्थायित्व कायम राख्दै महत्वपूर्ण नीतिलाई निरन्तरता दिने प्रयासका रूपमा अघि सारेको छ । जापानको नयाँ मन्त्रिपरिषद्ले आगामी संसद् अधिवेशनमा आर्थिक, कर तथा सुरक्षा नीतिसम्बन्धी विषयलाई अघि बढाउने तयारी गरेको छ ।