जापानमा एक लाखभन्दा बढी नागरिकको उमेर १०० वर्ष माथी

जापानमा १०० वर्ष वा सोभन्दा बढी उमेरका मानिसको संख्या पहिलोपटक एक लाख नाघेको छ। स्वास्थ्य मन्त्रालयका अनुसार जापानमा अहिले १ लाख ७ हजार ६ सय ७७ जना १०० वर्ष माथि पुगेका छन्।

 तीमध्ये ८८ प्रतिशत महिला छन्। सबैभन्दा ज्येष्ठ महिला क्योटोकी ११४ वर्षीया किशिमोतो फुयो र पुरुष कुमामोतोका ११२ वर्षीय काटो हिकारु रहेको बताइएको छ।

यो तथ्याङ्क जापानी समाजको उल्लेखनीय दीर्घायुको प्रमाण हो। तर यससँगै देशले सामना गरिरहेको अर्को गम्भीर चुनौती पनि उजागर गर्छ, बुढ्यौलीतर्फ तीव्र गतिमा अघि बढिरहेको जनसंख्या।

जापानीहरूको लामो आयुका पछाडि स्वस्थ खानपान, सक्रिय जीवनशैली र स्वास्थ्य सेवामा भएको प्रगतिलाई प्रमुख कारण मानिन्छ। जापानी भोजनमा माछा, तरकारी र भातको मात्रा बढी हुन्छ भने पश्चिमी खानाको तुलनामा संतृप्त बोसो कम हुन्छ। वृद्धवृद्धाहरू नियमित हिँडडुल गर्छन्, सार्वजनिक यातायात प्रयोग गर्छन्, साइकल चलाउँछन् र शारीरिक व्यायाममा सक्रिय रहन्छन्।

तर जापानमा जन्मदर भने लगातार घटिरहेको छ। जनसंख्या पुनःस्थापनाका लागि एउटी महिलाले औसत २.१ सन्तान जन्माउनुपर्ने मानिन्छ, जबकि गत वर्ष जापानको कुल प्रजनन दर १.१४ मा झरेको थियो। सन् २०७० सम्म जापानको जनसंख्या ८ करोड ७० लाखमा सीमित हुने अनुमान छ। अहिले ६५ वर्षभन्दा माथिका मानिसले कुल जनसंख्याको करिब ३० प्रतिशत हिस्सा ओगटेका छन्, जुन सन् २०७० सम्म झन्डै ४० प्रतिशत पुग्ने अपेक्षा गरिएको छ।

यसले पेन्सन, स्वास्थ्य सेवा, श्रमशक्ति र सामाजिक सुरक्षामा ठूलो दबाब सिर्जना गरिरहेको छ। वृद्ध जनसंख्याका लागि जापानी कम्पनीहरूले शरीर चलाउन सहयोग गर्ने एक्सोस्केलेटन र स्वचालित फोकस मिलाउने चस्माजस्ता प्रविधि विकास गरिरहेका छन्।