बर्दिबासमा तनाव, बस्ति हटाउने सूचना दिन गएको वन कार्यालयको गाडी जलाइयो

बर्दिबास, १२ जेठ । महोत्तरीको बर्दिबासमा स्थानीयले वन कार्यालयको गाडी जलाएका छन् ।

गए राति डिभिजन वन कार्यालयको टोली वन क्षेत्र खाली गराउन सूचना जारी गर्न पुगेको अवस्थामा स्थानीयले उनीहरुलाई नियन्त्रणमा लिएर गाडी जलाइदिएका हुन् ।

महोत्तरीका डिभिजन वन कार्यालय प्रमुख अजय कुमार मिश्रले गए राति करिब १२ बजे वन कार्यालयको गाडीमा आगजनी गरिएको बताएका छन् । स्थानीयले विपी राजमार्ग अवरुद्ध गर्दै वन कर्मचारीलाई घेराउ गरेपछि सुरक्षाकर्मीले उनीहरुको उद्धार गरेको थियो ।

महोत्तरीको राजाबास, कालापानी र वरडाडालगायत क्षेत्रमा करिब १ हजार १ सय हेक्टर अतिक्रमण गरिएको वन क्षेत्र खाली गराउन प्रक्रिया अघि बढाएपछि स्थानीय आक्रोशित भएको बताएका छन् । उनीहरुले मंगलबार बिहान सडक अवरुद्ध गरेर प्रदर्शन जारी राखेका छन् ।