इलाममा बाढीपहिरोबाट १७ जनाको मृत्यु

इलाम, १९ असोज । इलाममा बाढीपहिरोमा परी १७ जनाको मृत्यु भएको छ । इलामको इलाम नगरपालिका, सूर्योदय नगरपालिका, देउमाई नगरपालिका, माङसेबुङ गाउँपालिका र फाकफोकथुम गाउँपालिकामा पहिरोबाट मानवीय क्षति भएको छ ।

इलाम नगरपालिका–६ घोसस्थित डम्बर बहादुर तामाङको घर पहिरोले पुरिँदा घर भित्र रहेका ६ जनाको मृत्यु भएको छ ।

यसैगरी, सूर्योदय नगरपालिका–१ मानेभञ्ज्याङ्गस्थित राजु क्षेत्रीको घर पहिरोले पुर्दा ५ जनाको मृत्यु भएको छ । घर भत्किएको ठाउँबाट ४ जनाको शव फेला परेको थियो भने एक जनाको अस्पताल लैजानेक्रममा मृत्यु भएको प्रहरीले बताएको छ ।

यता, इलामको देउमाई नगरपालिका–५ घुसेनीस्थित दीपक लिम्बुको घर पहिरोले पुरिँदा २ जनाको मृत्यु भएको छ भने तीन जना अझै बेपत्ता छन् । सो घरबाट एक जनाको सकुशल उद्धार गरिएको छ ।

त्यस्तै, माङसेबुङ गाउँपालिका–५ स्थित पार्टीगाउँमा मदन लिम्बुको घर पहिरोले पुरिँदा ३ जनाको मृत्यु भएको छ भने फाकफोकथुम गाउँपालिका–३ रातोमाटेका सुरेश लिम्बुको पहिरोमा पुरिएर मृत्यु भएको प्रहरीले जानकारी दिएको छ ।