श्री अरविंदो १५३औं जन्मजयन्ती विशेष कार्यक्रम सहित मनाइँदै

काठमाडौं – भारतका महान योगी, दार्शनिक तथा स्वतन्त्रता सेनानी महर्षि श्री  अरविंदोको १५३औं जन्मजयन्तीको अवसरमा श्री अरविंदो योगा मन्दिरद्वारा विशेष कार्यक्रमको आयोजना गरिने भएको छ।

कार्यक्रम २०८२ भदौ ५ गते, शुक्रबार (२२ अगस्ट २०२५) ललितपुरको जावलाखेलस्थित डीएभी स्कूलमा दिउँसो ४ बजे देखि सुरु हुनेछ।

“श्री अरविंदोको जीवन र दर्शनबारे प्रवचन” शीर्षक दिइएको कार्यक्रममा स्वामी रामचन्द्र दासले श्री अरविंदोको आध्यात्मिक यात्रा, मानव जीवनप्रतिको दृष्टिकोण तथा समग्र योगको अवधारणामाथि आधारित सम्बोधन प्रस्तुत गर्नुहुनेछ।

कार्यक्रममा शास्त्रीय भरतनाट्यम नृत्य, नेपाली लोकनृत्य, भजनहरू तथा आध्यात्मिक गीतहरू प्रस्तुत गरिनेछ। आयोजक संस्थाका अनुसार कार्यक्रम सर्वसाधारणका लागि निःशुल्क र खुला हुनेछ।

श्रीअरविंदोको योग मन्दिरको स्थापना सन् १९९३ (वि.सं. २०५०) मा स्वामी रामचन्द्र दासद्वारा काठमाडौंको थानकोटमा गरिएको थियो। उहाँले भारतको पुडुचेरीमा १२ वर्ष श्री अरविंदोको आश्रममा रहेर तपस्या गरेपछि नेपाल फर्केर आश्रमको स्थापना गर्नुभएको हो।

 आश्रमले समग्र योग, आत्मनिर्भर शिक्षा, सेवा र कृषिमार्फत सयौं बालबालिकाको जीवनमा सकारात्मक परिवर्तन ल्याएको जानकारी आश्रमका ब्यबस्थापक प्रेम भुसालले बिन्दु पोस्ट संगको कुराकानीमा बताए ।

उनले कार्यक्रममा सहाभागी भइ दिन का लागि पनि सबैमा आग्रह गरे ।