कर्मचारीका ट्रेड युनियन खारेज गर्नुपर्छ : सांसद अमरेशकुमार सिंह

काठमाडौँ: स्वतन्त्र सांसद अमरेशकुमार सिंहलेसरकारी कर्मचारीहरूको ट्रेड युनियनहरू खारेज गर्नुपर्ने बताएका छन् । जनताले तिरेको करबाट तलब खाने सरकारी कर्मचारी नै ट्रेड युनियन खोलेर बस्नु सही नभएको उनको भनाइ थियो ।

प्रतिनिधिसभा अन्तर्गतको राज्यव्यवस्था तथा सुशासन समितिको आज बसेको बैठकमा ​संघीय निजामती सेवाको गठन, सञ्‍चालन र सेवाका सर्त सम्बन्धमा व्यवस्था गर्न बनेको विधेयकमाथि संशोधनकर्ताका रुपमा आफ्ना धारणा राख्ने क्रममा सांसद अमरेशकुमार सिंहले सो कुरा बताएका हुन् । 

'कर्मचारी युनियनहरू खारेज गर्नुपर्छ । सरकारको तलब खानेले युनियन बनाउने होइन, यस्तो गर्दा अराजकता हुन्छ,' उनले भने । हुलका हुल कर्मचारी युनियन आएर निर्वाचनमा सहयोग गर्ने भनेर आउने र आफूअनुकूल कानुन निर्माण गर्न लगाउने गरेको पनि उनको भनाइ थियो।

निजामती कर्मचारीलाई युनियन खोल्न दिने भए नेपाली सेना र प्रहरी संगठनहरूमा पनि खोल्ने हुनसक्ने सिंहको भनाइ थियो । सरकारी कर्मचारी नै रहेका सुरक्षा संगठनमा कार्यरतहरूलाई किन युनियन खोल्न नदिने भन्ने प्रश्न उठ्नसक्ने पनि सिंहको तर्क थियो ।

साथै सांसद सिंहले कर्मचारी जुन कार्यालयमा दरबन्दी गरिएको हो सोही कार्यालयमा काम गर्नैपर्ने कानुनी व्यवस्था राख्नुपर्ने सांसद सिंहको प्रस्ताव छ । कर्मचारीहरूलाई दरबन्दी रहेको जिल्लामा नगएर काजमा काठमाडौंमा बस्ने व्यवस्था राख्न नहुने उनको भनाइ थियो ।