भारतीय सामाजिक अभियन्ता सोनम वाङचुक गिरफ्तार

काठमाडौँ: भारतको लद्दाखमा भएको हिंसापछि सामाजिक अभियन्ता सोनम वाङचुकलाई पक्राउ गरिएको छ । लेहमा दुई दिन अघि भएको हिंसाको लागि वाङचुकलाई जिम्मेवार ठहराइएको छ ।

सेप्टेम्बर २४ मा लद्दाखको राजधानी लेहमा पूर्ण राज्यको मान्यता र छैटौं अनुसूचीमा समावेशको माग गर्दै हिंसा भड्किएको थियो ।

प्रहरीसँगको हिंसात्मक झडपमा चार युवाको मृत्यु भएको थियो । ४० प्रहरीसहित ८० जना घाइते भएका थिए । ६० जना अभियुक्त पक्राउ परेका छन् । शुक्रबार लगातार तेस्रो दिन लेहमा कर्फ्यू लगाइएको छ भने स्कूल र कलेजहरू भोलिसम्म बन्द छन् ।

यस घटनामा दोषी ठहर गर्दै वाङचुकको गैरसरकारी संस्थाको विदेशी कोष लाइसेन्स खारेज गरिएको छ । यसैबीच, गृह मन्त्रालयले लेह हिंसाको लागि वाङचुकलाई जिम्मेवार ठहराएको छ । बिहीबार, मन्त्रालयले वाङचुकको संस्था, स्टुडेन्ट्स एजुकेशनल एण्ड कल्चरल मुभमेन्ट अफ लद्दाखको विदेशी कोष लाइसेन्स खारेज गरेको थियो ।

गैरसरकारी संस्थाहरूले विदेशी अनुदान वा चन्दा प्राप्त गर्न विदेशी योगदान (नियमन) ऐन अन्तर्गत दर्ता गर्नुपर्नेछ । मन्त्रालयको निर्देशनमा, सीबीआई टोलीले विदेशी कोषको अनुसन्धान गरिरहेको थियो र संस्थाले कोषको दुरुपयोग गरेको पत्ता लगाएको थियो ।

सीबीआईले वाङचुकको स्वामित्वमा रहेको अर्को एनजीओ, हिमालयन इन्स्टिच्युट अफ अल्टरनेटिभ्स लद्दाखमा पनि विदेशी कोष मुद्दामा अनुसन्धान सुरु गरेको छ ।