पोखराको फिर्केखोला आसपासमा आज पनि संरचना हटाइदै

पोखरा: फिर्केखोलाको खोला घरमा निर्माण भएका संरचना हटाउने पोखरा महानगरपालिकाको अभियान आज दोस्रो दिन पनि जारी रहेको छ ।

पोखरा ७ र ८ को सिमाना जिरो किमी, पोखरा ४ र ५ को सिमाना बुढानीलकण्ठ मन्दिर र पोखरा १८ र २ को सिमाना अधेरीकुनादेखि वडा नं.४ तर्फ तीनै स्थानमा दोस्रो दिन पनि आज बिहान १० बजेदेखि संरचना भत्काउन शुरु गरिएको हो ।

फिर्केखोलाको नाप जाँच प्रतिवेदन, २०८० का अनुसार फिर्केखोला मिचेर निर्माण भएका संरचनाहरूको सङ्ख्या १६० रहेको छ । यसमा खोलाको दायाँबायाँ व्यक्तिगत रूपमा निर्माण भएका स्थायी प्रकृतिका ३५ वटा संरचना रहेका छन् भने, अस्थायी प्रकृतिका ९७ वटा संरचनाहरू रहेका छन् । यस्तै विभिन्न संस्थाका नाममा बनेका संस्थागत संरचनाहरूको सङ्ख्या भने स्थायी १८ र अस्थायी १० वटा संरचना निर्माण भएको पाइएको छ ।

यी संरचनाहरू हटाएर पोखरा महानगरपालिकाले फिर्केखोलाको संरक्षण, विकास र सौन्दर्यीकरणको योजना अगाडी सारेको छ । योजना अनुसार फिर्केखोलाको दायाँबायाँ साइकल ट्र्याक, फुटपाथ सहितको कोरिडोर निर्माण हुनेछ । फिर्केलाई एक आकर्षक पर्यटन गन्तव्यका रूपमा विकास गरिने छ । नगर प्रमुख धनराज आचार्यका अनुसार पोखराको सभ्यताका रूपमा रहेको फिर्केखोलाको संरक्षण वातावरण तथा पर्यावरण संरक्षणका दृष्टिले पनि निकै महत्त्वपूर्ण हुनेछ । 

वातावरण संरक्षणका लागि महाअभियान नेपालका संयोजक राम बहादुर पौडेलले समेत यसलाई संरक्षण तथा विकास गर्ने महानगरपालिकाको योजनामा नागरिक समाजको तर्फबाट पूर्ण साथ रहने बताउँदै आएका छन् । फिर्केखोलाको खोलाघर खाली गर्ने अभियानमा पोखरा महानगरपालिकामा प्रतिनिधित्व गर्ने जनप्रतिनिधिहरूले नेतृत्वदायी र सक्रिय सहभागिता जनाइरहेका छन् ।