धरानमा सुकुम्वासीको विरोध प्रदर्शन, काठमाडौं डोजर अभियानविरुद्ध आक्रोश

काठमाडौँ: काठमाडौँ उपत्यकाको खोला किनारमा सुकुम्वासी बस्ती भत्काइएको विरोधमा सुनसरीको धरानमा प्रदर्शन भएको छ। धरान को छाता चोकबाट सुरु भएको प्रदर्शन बजार परिक्रमा गर्दै सम्पन्न भएको हो।

नेपाल बसोबास बस्ती संरक्षण समाज र बस्ती रक्षा संरक्षण परिचालन समितिको अगुवाइमा भएको प्रदर्शनमा सहभागीहरूले काठमाडौंको डोजर अभियान र सरकारको कदमको विरोध गरेका छन्। उनीहरूले सुकुम्वासीलाई बसोबासको वैकल्पिक व्यवस्था नगरी घरटहरा भत्काउनु अमानवीय भएको आरोप लगाएका छन्।

प्रदर्शनकारीहरूले संविधानले आवासको हक सुनिश्चित गरेकाले सरकारले सुकुम्वासीको बसोबासको ग्यारेन्टी गर्नुपर्ने माग गरेका छन्। आयोजक कुमार कार्की ले सरकारी कदमलाई ‘राज्य आतंक’ भन्दै कडा आलोचना गरेका छन्।

धरानमा हजारौँ सुकुम्वासी सहभागी रहेको प्रदर्शनमा विभिन्न राजनीतिक दलका प्रतिनिधिहरू पनि उपस्थित थिए। स्थानीय बस्तीहरू खहरे कोरिडोर, देउराली, मङ्गलबारे, सर्दु किनारलगायत क्षेत्रमा सुकुम्वासीको बसोबास रहेको जनाइएको छ।