पत्रकार महासंघका पूर्वसभापति दाहालको निधन

काठमाण्डौ, २६ पुष । नेपालको प्रजातान्त्रिक आन्दोलनका योद्धा तथा नेपाल पत्रकार महासंघका पूर्वसभापति होमनाथ दाहालको गएराति निधन भएको छ ।

पूर्वकृषि, सहकारी तथा गरिबी निवारणमन्त्री समेत रहेका ८४ बर्षिय दाहाल हृदयाघात भएपछि वीरअस्पतालमा निधन भएको काँग्रेस नेता रामहरी खतिवडाले जानकारी दिएका छन् ।

ओखलढुंगा जिल्लाको तत्कालीन बरुणेश्वर गाउँपालिकामा जन्मिएका दाहाल नेपाली कांग्रेसको मुखपत्र राष्ट्रपुकार साप्ताहिकको सम्पादक थिए । उनले नेपाली कांग्रेस ओखलढुंगा जिल्ला सदस्य तथा तत्कालीन नेपाली कांग्रेस (प्रजातान्त्रिक)का केन्द्रीय सदस्यसमेत भएर जिम्मेवारी सम्हालेका थिए ।

नेता खतिवडाका अनुसार उनको आज बिहान साढे ९ बजे पशुपति आर्यघाटमा अन्तिम संस्कार गरिने जानकारी दिएका छन् ।