विश्व हिन्दु महासंघको अधिवेशन: हिन्दु अभियान्ता र गुरूहरूको असन्तुष्टि

काठमाडौं: विश्व हिन्दु महासंघको १० औं अधिवेशन नगरी कार्यवाहक अध्यक्ष टिका देवी भण्डारीले आफूखुशी अधिवेशन गरेको भनि हिन्दु अभियान्ता र धार्मिक सन्त समाज रुष्ट देखिएका छन्। 

अधिवेशनका सम्बन्धमा विवाद निस्किएपछि उच्च अदालत पाटनमा मुद्धा परेको थियो। अदालतबाट सुनुवाई भई अदालतको मर्मबमोजिम काठमाडौं जिल्ला प्रशासन कार्यालयले १० औं अधिवेशन गर्नका लागि मिति समेत निश्चित गरि पत्र काटेको थियो। तर अस्मिता भण्डारीले एकलौटि ढंगले जनकपुरमा अधिवेशन गरी आफुलाई अध्यक्ष घोषित गरेकोमा धार्मिक क्षेत्रका अगुवाहरू यसलाई मान्यता दिन नहुने बताईरहेका छन्।  

महासम्मेलनका सम्बन्धमा उच्च अदालत पाटनको मुद्धा न ०७९-Wo-११४३७ को निषेधाज्ञा समेतको रिट निवेदनमा मिति २०८०/०८/०६ को फैसला बमोजिम १० औं महासम्मेलनबट मनोनयन गरिएको कार्यवहाक अध्यक्ष टिका देवी भण्डारी (अस्मिता) को नेतृत्वमा यथासक्य छिटो निर्वाचन गराई संस्थाको जीवन्तता प्रदान गर्नका लागि कानुनबमोजिम १० औं महाधिवेसन काठमाडौंमा गर्न जिल्ला प्रशासन कार्यालयको पत्रमा उल्लेख छ । तर टिका देवी भण्डारी (अस्मिता) ले २८ गते शुक्रबार जनकपुरमा अधिवेशन गरी आफुलाई निर्विरोध अध्यक्ष घोषित गरिन।

अध्यक्षका दावेदार व्यासाचार्य गुरू किशोर गौतम भन्नुहुन्छ, "मलाई समेत यस अधिवेशनका बारेमा खबर नै गरिएन, साथै देशका कुनै पनि धार्मिक संघ संस्थाहरूलाई कुनै जानकारी गरिएन।" उहाँ भन्नुहुन्छ "१० औं अधिवेशन काठमाडौँमा गर्नका लागि जिल्ला प्रशासन कार्यालयले निर्देशन गरेकोमा त्यसको विपरित यस अधिवेशन भएको हुनाले यसलाई धार्मिक संघ संस्थाले मात्रै होइन कानुनि रुपले समेत मान्य हुने छैन।" 

धार्मिक क्षेत्रको नेतृत्व सहि व्यक्तिको हातमा नहुँदा र यसरी कुनै व्यक्तिहरूले मनोमानी ढंगले धार्मिक संघठन संचालन गर्न खोज्दा हिन्दु राष्ट्रको माग ओझेलमा परेको धार्मिक अभियान्ताहरूको ठहर छ।