इरानको आक्रमणमा अमेरिकाको अत्याधुनिक क्षेप्यास्त्र प्रतिरक्षा प्रणाली नष्ट

काठमाडौँ । इरानको आक्रमणमा अमेरिकाको अत्याधुनिक क्षेप्यास्त्र प्रतिरक्षा प्रणाली नष्ट भएको खबर सार्वजनिक भएको छ । सञ्चारमाध्यमका विवरणअनुसार जोर्डनस्थित एक सैनिक हवाई अड्डामा रहेको अमेरिकी क्षेप्यास्त्र प्रतिरक्षा राडार प्रणाली आक्रमणमा ध्वस्त भएको हो ।

उक्त आक्रमण मुवफ्फाक साल्ती सैनिक हवाई अड्डामा भएको बताइएको छ । सो स्थानमा अमेरिकाले उच्च उचाइमा सञ्चालन हुने क्षेप्यास्त्र प्रतिरक्षा प्रणाली तैनाथ गरेको थियो । आक्रमणका क्रममा शत्रुको क्षेप्यास्त्र पहिचान गर्ने शक्तिशाली राडार प्रणाली पनि नष्ट भएको जनाइएको छ ।

यो राडार प्रणालीको मूल्य करिब ३० करोड अमेरिकी डलर अर्थात् झन्डै ४३ अर्ब नेपाली रुपैयाँ बराबर रहेको बताइन्छ । यसको मुख्य काम शत्रुपक्षबाट प्रहार गरिएका क्षेप्यास्त्र पहिचान गर्नु र प्रतिरक्षा प्रणालीलाई त्यसलाई नष्ट गर्न सहयोग गर्नु हो ।

राडार प्रणाली र उच्च उचाइ क्षेप्यास्त्र प्रतिरक्षा प्रणाली एउटै सुरक्षा संयन्त्रका भाग हुन्। राडारले शत्रुको क्षेप्यास्त्र पहिचान गर्छ भने प्रतिरक्षा प्रणालीले आकाशमै त्यसलाई नष्ट गर्ने काम गर्छ ।

उपग्रहबाट प्राप्त तस्बिरहरूमा हवाई अड्डाको उक्त क्षेत्रमा ठूलो क्षति भएको तथा ठूला खाडलहरू देखिएको बताइएको छ। त्यसका आधारमा त्यहाँ धेरै क्षेप्यास्त्र प्रहार गरिएको अनुमान गरिएको छ ।

उक्त राडार प्रणाली फेब्रुअरी महिनाको मध्यतिर मात्र सो हवाई अड्डामा स्थापना गरिएको थियो । त्यसको केही समयपछि अमेरिका र इजरायलले ईरानका विभिन्न स्थानमा आक्रमण सुरु गरेका थिए, जसपछि क्षेत्रीय तनाव झन् बढेको छ।