सरकारमाथि पौडेलको प्रश्न : नागरिक स्वतन्त्रता खोस्ने प्रयास किन ?

काठमाडौँ : नेपाली कांग्रेसका महामन्त्री प्रदीप पौडेलले सरकार नागरिकको स्वतन्त्रता सीमित गर्ने दिशामा अघि बढिरहेको आरोप लगाएका छन् ।

आइतबार काठमाडौँको टोखामा आयोजित शुभकामना आदानप्रदान कार्यक्रममा बोल्दै पौडेलले नागरिक स्वतन्त्रतामाथि नियन्त्रण गर्ने प्रवृत्ति बढ्दै गएको दाबी गरे । उनले यस्तो प्रवृत्तिले निरङ्कुश शासन व्यवस्था हाबी हुने खतरा बढाएको बताए ।

सरकारका प्रधानमन्त्रीका सल्लाहकारले आफूविरुद्धका प्रमाण मेटाउने र आफूलाई अनुकूल हुने प्रमाण मात्रै सार्वजनिक गर्ने गरेको आरोप पनि पौडेलले लगाए । अहिलेको व्यवस्था स्थापनामा कुनै योगदान नगरेकाहरूलाई समेत जनताले दुईतिहाइ मत दिएको उल्लेख गर्दै उनले प्राप्त जनमतको दुरुपयोग नगर्न सरकारलाई आग्रह गरे ।

पौडेलले नेपाली कांग्रेसभित्र बृहत् एकताका लागि आफूले अधिकतम प्रयास गरिरहेको पनि बताए । विधिको शासन भएको मुलुकमा एउटै पार्टीका दुई सभापति, दुई झन्डा र दुई चुनाव चिह्न हुन नसक्ने उनको भनाइ थियो ।

कांग्रेसको अर्को पक्षबाट भइरहेका गतिविधि विधिको शासनविपरीत रहेको आरोप लगाउँदै उनले पार्टीभित्रको विवाद समाधान गर्न विधि र प्रक्रियाको पालना गर्नुपर्नेमा जोड दिए ।