सरकारले दबाब दिएको भन्दै साइबर ब्युरो पुगे कांग्रेस नेता शिवाकोटी

काठमाडौँ : नेपाली कांग्रेसका सहमहामन्त्री अजयबाबु शिवाकोटी नेपाल प्रहरीको साइबर ब्युरोमा उपस्थित भएका छन् । आफूविरुद्ध परेको उजुरीमाथि अनुसन्धानका लागि ब्युरोले उपस्थित हुन ताकेता गरेपछि उनी आइतबार दिउँसो त्यहाँ पुगेका हुन् ।

साइबर ब्युरो प्रवेश गर्ने क्रममा सञ्चारकर्मीसँग कुरा गर्दै शिवाकोटीले सरकारको दबाबमा प्रहरीले आफूलाई बोलाएको र अनुसन्धान अघि बढाएको आरोप लगाए ।

सत्तारूढ दल तथा प्रधानमन्त्री बालेन शाहनिकट व्यक्तिहरूले नेपाली कांग्रेस र पार्टी नेतृत्वमाथि निरन्तर प्रहार गरिरहेको दाबी गर्दै उनले त्यसको प्रतिवाद गर्दा आफूविरुद्ध उजुरी परेको हुन सक्ने बताए ।

उनले विगतमा प्रधानमन्त्री बालेन शाहले ‘सिंहदरबार जलाइदिन्छु’ भन्ने अभिव्यक्ति दिँदा त्यसलाई अभिव्यक्ति स्वतन्त्रताका रूपमा लिइएको स्मरण गराए । तर, अहिले प्रधानमन्त्रीका सल्लाहकार तथा निकट व्यक्तिहरूले प्रतिपक्षीको आवाज दबाउन खोजिरहेको आरोप शिवाकोटीले लगाए ।

प्रतिपक्षी दलका नेताहरूको अभिव्यक्तिमाथि अनुसन्धानका नाममा दबाब सिर्जना गर्ने काम भइरहेको उनको भनाइ थियो ।