लामिछानेको सन्देश : सामाजिक एकता र राष्ट्रिय सद्भाव बलियो बनाऔँ

काठमाडौँ : राष्ट्रिय स्वतन्त्र पार्टी (रास्वपा) का सभापति रवि लामिछानेले तिहार, नेपाल संवत् तथा छठजस्ता पर्वले सामाजिक सद्भाव, आपसी प्रेम र राष्ट्रिय एकतालाई थप मजबुत बनाउन सहयोग पुगोस् भन्ने कामना गरेका छन् ।

दीपावली, नेपाल संवत् र छठ पर्वको अवसरमा सामाजिक सञ्जालमार्फत शुभकामना व्यक्त गर्दै लामिछानेले परिवार, समाज तथा समुदायबीचको आपसी सम्बन्ध र सद्भावलाई अझ सुदृढ बनाउन पर्वहरूको विशेष भूमिका रहने बताएका हुन् ।

उनले विविधताबीच कायम रहेको राष्ट्रिय एकतालाई थप बलियो बनाउँदै देशमा सुख, शान्ति, समृद्धि र नयाँ आशाको सञ्चार होस् भन्ने शुभेच्छा व्यक्त गरेका छन् । तिहारले उज्यालो, उमङ्ग र उत्साह तथा छठले आस्था, श्रद्धा र समर्पणको भावना जगाउने उल्लेख गर्दै उनले यी पर्वले सबै नेपालीको जीवनमा सकारात्मक ऊर्जा ल्याओस् भन्ने कामना गरेका छन् ।

यसैबीच, राष्ट्रिय एकताको सन्देशसहित यस वर्षको छठ पर्व मनाउन आफूहरू जनकपुरधामस्थित गङ्गासागरमा उपस्थित हुने जानकारी पनि लामिछानेले दिएका छन् । उनले पर्वका माध्यमबाट सामाजिक सद्भाव र राष्ट्रिय एकतालाई अझ मजबुत बनाउने सन्देश दिएका छन् ।