जेनजी आन्दोलनको प्रतिवेदनप्रति नेपाल बार एसोसिएसनको गम्भीर आपत्ति

गत भदौ २३ र २४ गते भएको जेनजी आन्दोलनबारे कार्की आयोगले बुझाएको प्रतिवेदनप्रति नेपाल बार एसोसिएसनले तीव्र असन्तुष्टि व्यक्त गरेको छ। 

आयोगले आफ्नो क्षेत्राधिकार नाघेर न्यायालय र कानुन व्यवसायीको मानमर्दन हुने गरी प्रतिवेदन तयार पारेको बारको निष्कर्ष छ।

महासचिव केदारप्रसाद कोइरालाका अनुसार, प्रतिवेदनमा कानुन व्यवसाय र न्यायपालिकाप्रति समाजमा नकारात्मक भ्रम फैलाउने शब्दावली प्रयोग गरिएको छ।

प्रतिवेदनले न्यायालयलाई 'वकिलको स्वर्ग' भनी टिप्पणी गरेको र वकिलको शुल्कका विषयमा आपत्तिजनक कुरा उल्लेख गरेको भन्दै बारले यसलाई स्वीकार नगर्ने बताएको छ। यस विषयमा थप छलफल र आधिकारिक धारणा तय गर्न बारले आज दिउँसो १:३० बजे सल्लाहकार समिति र संवैधानिक समितिको बैठक बोलाएको छ।