चीन भ्रमणअघि लामिछानेसँग रास्वपा टोलीको छलफल

काठमाडौं : चीन भ्रमणमा जान लागेको राष्ट्रिय स्वतन्त्र पार्टी (रास्वपा)को उच्चस्तरीय प्रतिनिधिमण्डलले पार्टी सभापति रवि लामिछानेसँग भेटवार्ता गरेको छ। 

भ्रमणको तयारी तथा चीनमा हुने छलफलका विषयमा टोलीले आज बिहान सभापति लामिछानेसँग परामर्श गरेको हो।

चिनियाँ कम्युनिस्ट पार्टी (सीपीसी)को औपचारिक निमन्त्रणामा रास्वपाका महामन्त्री विपिन कुमार आचार्यको नेतृत्वमा पार्टीको उच्चस्तरीय प्रतिनिधिमण्डल भोलिदेखि चीन भ्रमणमा जाँदैछ।

चीन प्रस्थान गर्नुअघि प्रतिनिधिमण्डलले सभापति लामिछानेसँग पार्टी सभापति निवासमा भेट गरी भ्रमणका क्रममा उठाइने विषय, छलफलका एजेन्डा तथा समग्र तयारीबारे जानकारी गराएको थियो।

भेटवार्ताका क्रममा सभापति लामिछानेले चीन भ्रमणलाई उपलब्धिमूलक बनाउन आवश्यक विषयमा टोलीसँग छलफल तथा सुझाव दिएको रास्वपाले जनाएको छ।