कांग्रेस महाधिवेशन: मनोनयन दर्ताको समय साँझ ६ बजेसम्म थप

काठमाडौं । नेपाली कांग्रेसको १५औँ केन्द्रीय महाधिवेशनअन्तर्गत केन्द्रीय कार्यसमितिको निर्वाचनका लागि उम्मेदवारको मनोनयन पत्र दर्ताको समय थप गरिएको छ ।

केन्द्रीय कार्यसमितिको निर्वाचनका लागि यसअघि मंगलबार दिउँसो ४ बजेसम्म मनोनयन पत्र दर्ता गर्ने समय तोकिएको थियो । निर्वाचन समितिले उक्त समय बढाएर साँझ ६ बजेसम्म पुर्‍याएको जनाएको छ ।

महाधिवेशन केन्द्रीय निर्वाचन समितिका सदस्यसचिव राजु कटुवालले सूचना जारी गर्दै तोकिएको समयभित्र मनोनयन पत्र दाखिल गर्न सम्पूर्ण केन्द्रीय महाधिवेशन प्रतिनिधि सदस्यलाई आग्रह गरेका छन् । काठमाडौंमा भइरहेको १५औँ केन्द्रीय महाधिवेशनअन्तर्गत केन्द्रीय कार्यसमितिको निर्वाचनका लागि उम्मेदवारहरूले अब राष्ट्रिय सभा गृहमा पुगेर साँझ ६ बजेसम्म मनोनयन दर्ता गर्न सक्नेछन् ।