४० हजार धरौटीमा छुटे किस्पाङ अध्यक्ष तामाङ, १० करोडभन्दा बढीका मुद्दामा पुनः पक्राउको तयारी

काठमाडौं । नुवाकोटको किस्पाङ गाउँपालिकाका अध्यक्ष वीरबल तामाङलाई काठमाडौं जिल्ला अदालतले ४० हजार रुपैयाँ धरौटीमा रिहा गर्न आदेश दिएको छ । सोमबार सिंहदरबारबाट पक्राउ परेका तामाङलाई अदालतको आदेशपछि पनि अन्य मुद्दाको अनुसन्धानका लागि प्रहरीले पुनः हिरासतमा लैजाने भएको छ ।

प्रहरी वृत्त दरबारमार्गमा दर्ता भएको जाहेरीका आधारमा तामाङ पक्राउ परेका थिए । उनीविरुद्ध अरुण अर्यालले ५ लाख २५ हजार रुपैयाँको बाउन्स चेकसम्बन्धी मुद्दामा जाहेरी दिएका थिए ।

प्रहरीले तामाङलाई मंगलबार जिल्ला अदालतमा पेश गरेको थियो । न्यायाधीश टिकेन्द्र दाहालको इजलासले उनलाई ४० हजार रुपैयाँ धरौटीमा रिहा गर्न आदेश दिएको हो ।

तर, तामाङविरुद्ध अन्य नौवटा मुद्दा रहेको प्रहरीले जनाएको छ । जिल्ला प्रहरी परिसर काठमाडौंका प्रवक्ता एसपी दानबहादुर थापाका अनुसार परिसरमै बैंकिङ कसुरसम्बन्धी पाँचवटा मुद्दा दर्ता छन् । त्यस्तै, महाराजगञ्ज, जनसेवा र लैनचौर प्रहरी वृत्तमा पनि उनीविरुद्ध बैंकिङ कसुरका मुद्दा दर्ता भएका छन् ।

भक्तपुर जिल्ला प्रहरी परिसरमा भने तामाङविरुद्ध ठगीसम्बन्धी मुद्दा दर्ता रहेको प्रहरीले जनाएको छ । दर्ता भएका सबै मुद्दाका मिसिल जिल्ला सरकारी वकिलको कार्यालयमा पेश गरिएको छ । प्रहरीका अनुसार तामाङविरुद्ध दर्ता भएका मुद्दाको कुल रकम १० करोड रुपैयाँभन्दा बढी छ ।

भोटेकोशी बाढी प्रभावित क्षेत्रका जनप्रतिनिधिसँग प्रधानमन्त्री बालेन शाहले गरेको छलफलपछि बाहिरिने क्रममा सोमबार अनामनगरको हनुमानस्थानबाट तामाङ पक्राउ परेका थिए ।

पक्राउपछि प्रहरी वृत्त दरबारमार्गमा राखिएका उनलाई मंगलबार भद्रकालीस्थित जिल्ला प्रहरी परिसर काठमाडौंमा लैजाने तयारी गरिएको छ । परिसरमा दर्ता भएका पाँचवटा मुद्दामा अनुसन्धान अघि बढाउन उनलाई पुनः अदालतमा पेश गरिने प्रवक्ता एसपी थापाले बताए ।