गृहमन्त्रीसँग छलफलपछि मृतक मेहताका आफन्त शव बुझ्न तयार

काठमाडौँ: सुनसरी घटनामा मृत्यु भएका रवीन्द्र मेहताका आफन्त शव परीक्षणका लागि सहमत भएका छन् ।

आज गृहमन्त्री सुधन गुरुङको उपस्थितिमा शिक्षण अस्पताल महाराजगञ्जमा भएको छलफलपछि उक्त सहमति भएको हो ।

गृहमन्त्रीको सचिवालयका अनुसार सरकारले मृतक परिवारले उठाएका माग सम्बोधन गर्न पूर्ण प्रतिबद्धता जनाएको छ ।

छलफलका क्रममा गृहमन्त्री गुरुङले घटनाप्रति दुःख व्यक्त गर्दै मृतकका परिवारलाई आवश्यक सहयोग र राहत उपलब्ध गराउन सरकार तयार रहेको आश्वासन दिएका छन् ।

वार्तामा सहभागी आफन्तले मृतकका बुबाआमासँग थप परामर्श गरेपछि भोलि पुनः छलफल गर्ने बताएका छन् । उनीहरूले हाल शव बुझेर परीक्षणका लागि शिक्षण अस्पताल पठाउन सहमति जनाएका छन् ।

गृहमन्त्रीको सचिवालयका अनुसार सरकार र परिवारबीचको संवाद सकारात्मक रूपमा अघि बढिरहेको छ । भोलि पुनः छलफल गरी सहमतिलाई अन्तिम रूप दिने तयारी गरिएको छ ।

सुनसरीको देवानगञ्ज गाउँपालिका–३, कप्तानगञ्जमा साउन १० गते राति भएको घटनामा घाइते भएका २२ वर्षीय रवीन मेहताको उपचारका क्रममा त्रिभुवन विश्वविद्यालय शिक्षण अस्पतालमा निधन भएको थियो।