ओलीले आईजीपी नियुक्तिमाथि गरे व्यंग्य, भने– ‘अह्राएको गर्छ भनेर बनाएको होला’

काठमाडौं : नेकपा एमालेका अध्यक्ष केपी शर्मा ओलीले नेपाल प्रहरीको महानिरीक्षक (आईजीपी) परिवर्तन गर्ने सरकारको निर्णयप्रति व्यंग्यात्मक टिप्पणी गरेका छन् ।

पार्टी मुख्यालय च्यासलबाट बाहिरिने क्रममा सञ्चारकर्मीसँग संक्षिप्त प्रतिक्रिया दिँदै ओलीले सरकारले आफूले अह्राएको काम गराउन आईजीपी परिवर्तन गरेको हुन सक्ने टिप्पणी गरेका हुन् ।

सरकारले आज आईजीपी दानबहादुर कार्कीलाई पदबाट हटाउँदै डा. मनोजकुमार केसीलाई नयाँ प्रहरी महानिरीक्षकमा नियुक्त गरेको थियो ।

नवनियुक्त आईजीपी केसीको नियुक्तिबारे सञ्चारकर्मीले सोधेको प्रश्नमा ओलीले भने, ‘उहाँहरूले अह्राएको गर्छ भनेर बनाएको होला।’

ओलीको उक्त टिप्पणी प्रहरी नेतृत्व परिवर्तनको निर्णयलाई लिएर आएको हो । सरकारले आईजीपी परिवर्तन गरेपछि यस विषयमा राजनीतिक वृत्तमा समेत चासो बढेको छ ।