विश्वकपको नकआउटमा भोली बिहान जर्मनी र पराग्वे भिड्दै

काठमाडौँ: फिफा विश्वकप फुटबल अन्तर्गत अन्तिम ३२ को बहुप्रतीक्षित खेलमा जर्मनी र पाराग्वे आमनेसामने हुँदैछन् । बोस्टन रंगशालामा हुने यो खेल नेपाली समय अनुसार भोली बिहान २: ४५ बजेदेखि शुरु हुदैछ ।   

सन् २०१४ मा विश्वकप जितेपछि पहिलो पटक नकआउट चरणको खेल खेल्न लागेको जर्मनी उपाधि यात्रालाई निरन्तरता दिने लक्ष्यमा छ भने पाराग्वे इतिहास रच्ने योजनासहित मैदान उत्रनेछ ।

जुलियन नागेल्समानको प्रशिक्षणमा रहेको जर्मनी समूह ‘ई’ को विजेताका रूपमा नकआउट चरणमा पुगे पनि समूह चरणमा टोलीको प्रदर्शन मिश्रित रह्यो । पहिलो खेलमा कमजोर प्रतिद्वन्द्वी कुरासाओलाई ७-१ गोलले पराजित गरेको जर्मनीले त्यसपछि आइभरी कोस्टविरुद्ध पुनरागमन गर्दै २-१ को जित निकालेको थियो । अन्तिम खेलमा भने इक्वेडरसँग २-१ ले पराजित भए पनि समूह विजेता बन्न सफल भयो ।

सन् २०१८ र २०२२ मा समूह चरणबाटै बाहिरिएको जर्मनीका लागि यसपटक नकआउट चरणमा पुग्नु नै ठूलो उपलब्धि बनेको छ । टोलीले पछिल्ला नौ नकआउट खेलमध्ये आठमा जित निकालेको इतिहास बोकेको छ । सन् २०१४ को विश्वकपको फाइनलमा अर्जेन्टिनालाई अतिरिक्त समयमा १- ० ले हराउँदै जर्मनीले चौथो पटक विश्व उपाधि जितेको थियो ।

समूह चरणमा जर्मनीका लागि अर्को सकारात्मक पक्ष भनेको गोल गर्ने खेलाडीको विविधता रह्यो । टोलीले गरेको १० गोलमा सात फरक खेलाडीले गोल गरेका छन् । यदि नकआउट चरणमा अर्को फरक खेलाडीले गोल गरे जर्मनीले एकै विश्वकप संस्करणमा आठ फरक गोलकर्ता हुने आफ्नो पुरानो कीर्तिमानसँग बराबरी गर्नेछ ।

३८ वर्षका नागेल्समान विश्वकपको नकआउट खेलमा टोलीको नेतृत्व गर्ने पछिल्ला चार दशककै सबैभन्दा कम उमेरका प्रशिक्षक बन्नेछन् । यस्तै अनुभवी गोलरक्षक मानुएल नोयर मैदान उत्रिए विश्वकपमा जर्मनीका लागि सबैभन्दा धेरै खेल सुरु गर्ने खेलाडीको नयाँ कीर्तिमान बनाउनेछन् । उनको यो २३औँ विश्वकप खेल हुनेछ।

यता पाराग्वेले भने कठिन सुरुआतपछि प्रभावशाली पुनरागमन गर्दै अन्तिम ३२ मा स्थान सुरक्षित गरेको हो । आयोजकमध्ये एक अमेरिका विरुद्ध पहिलो खेल ४–१ ले गुमाएको पाराग्वेले त्यसपछि १० खेलाडीमा सीमित रहँदै टर्कीलाई १-० ले हरायो भने अस्ट्रेलियासँग गोलरहित बराबरी खेल्दै नकआउट चरणमा प्रवेश गर्यो ।

पाराग्वेका लागि जुलियो एन्सिसो सबैभन्दा प्रभावशाली खेलाडी बनेका छन् । उनले टोलीका दुवै गोलमा अवसर सिर्जना गरेका छन् र आक्रमण निर्माणका अधिकांश सूचकमा टोलीकै अग्रस्थानमा छन् । विपक्षीको क्षेत्रमा सबैभन्दा धेरै दबाब सिर्जना गर्ने खेलाडी पनि उनी नै हुन् । पाराग्वे इतिहासमा पाँचौँ पटक विश्वकपको नकआउट चरणमा पुगेको हो । तर यसअघि खेलेका पाँच नकआउट खेलमध्ये उसले केवल एक खेल मात्र जितेको छ । त्यो जित सन् २०१० मा जापानविरुद्ध पेनाल्टी सुटआउटमार्फत आएको थियो । अझ उल्लेखनीय कुरा के छ भने पाराग्वेले विश्वकपका नकआउट चरणका पाँच खेलमा अहिलेसम्म नियमित समयमा एक गोल पनि गर्न सकेको छैन ।

जर्मनी र पाराग्वेबीच यसअघि दुई पटक भेट भएको छ । विश्वकपमा उनीहरू सन् २००२ मा आमनेसामने भएका थिए, जहाँ जर्मनीले अन्तिम समयमा गरेको एक गोलको मद्दतमा १-० को जित निकालेको थियो । त्यसयता सन् २०१३ मा भएको मैत्रीपूर्ण खेल भने ३-३ को रोमाञ्चक बराबरीमा सकिएको थियो ।

तथ्याङ्क भने जर्मनीको पक्षमा देखिन्छ । जर्मनीले दक्षिण अमेरिकी टोलीविरुद्ध खेलेका पछिल्ला पाँच विश्वकप नकआउट खेल जितेको छ । अर्कोतर्फ पाराग्वेले युरोपेली टोलीविरुद्ध खेलेका चारै विश्वकप नकआउट खेल गुमाएको छ र तीमध्ये कुनै खेलमा गोल गर्न सकेको छैन । इतिहास, अनुभव र टोलीको गहिराइका आधारमा जर्मनीलाई बलियो दाबेदार मानिएको छ । तर समूह चरणमा संघर्षपूर्ण प्रदर्शन गरेको जर्मनीले पाराग्वेलाई हल्का रूपमा लिन सक्ने अवस्था छैन । पाराग्वे अनुशासित र रक्षात्मक खेलमार्फत फेरि एकपटक चमत्कार गर्ने लक्ष्यमा हुनेछ ।