बीवाइडी गाडीको राजस्व छली प्रकरण: रसुवागढीका भन्सार प्रमुखसहित ९ कर्मचारी जिम्मेवारीमुक्त

बीवाइडी कम्पनीका विद्युतीय सवारी साधनको आयातमा राजस्व छली भएको आशंकामा छानबिन अघि बढेसँगै अर्थ मन्त्रालयले रसुवागढी भन्सारका प्रमुख तुलसीप्रसाद भट्टराईसहित ९ जना कर्मचारीलाई जिम्मेवारीमुक्त गरेको छ। भन्सार यार्डमा गाडी नआईकन चीनतर्फ नै पुगेर कागजी जाँचपास गराएको सूचना बाहिरिएपछि उनीहरूलाई भन्सार विभाग तानिएको हो।

मन्त्रालयका जनसम्पर्क सल्लाहकार नवीन ढुंगानाका अनुसार यस प्रकरणमा अर्थ मन्त्रालय, भन्सार विभाग र सुरक्षा निकाय सम्मिलित टोलीले सुक्ष्म अनुसन्धान गरिरहेको छ। अर्थमन्त्री डा. स्वर्णिम वाग्लेले दोषी देखिएका जो-कोहीलाई पनि कानुनी कारबाहीको दायरामा ल्याउन प्रतिबद्धता जनाउनुभएको छ। सशस्त्र प्रहरीले विभिन्न स्थानबाट नियन्त्रणमा लिएका ७ सय ७९ वटा बीवाइडी गाडीका सम्बन्धमा विस्तृत अध्ययन गर्न सरकारले उच्चस्तरीय छानबिन समितिसमेत गठन गरेको छ। 

प्रधानमन्त्रीका प्रेस तथा अनुसन्धान विज्ञ दीपा दाहालका अनुसार समितिले स्थलगत रूपमै पुगेर कागजातहरूको प्रमाणीकरण र सुक्ष्म अध्ययन सुरु गरिसकेको छ।