सुरुङभित्र हामी हरेकृष्ण महामन्त्रको जप गरिरहेका थियौँ: सञ्जय साह

काठमाडौं" रसुवामा बाढी आएको १० दिनपछि त्रिशुली ३ ‘ए’ जलविद्युत आयोजनाको सुरुङबाट जीवित उद्धार गरिए सञ्जय साह । उनी कन्ट्रोल रुममा अपरेटरको काम गर्थे ।

उद्धारपछि उनले टनेलभित्र ४-५ जनामात्रै आफ्नो सम्पर्कमा रहेको बताएका छन् । तर, पावर हाउसभित्र अरु व्यक्तिहरु थुनिएको हुन सक्ने उनको आशंका छ ।

अस्पताल लैजाने क्रममा नेपाली सेनाले उनीसँग त्यहाँको वस्तुस्थितिबारे संक्षिप्त कुराकानी गरेको थिए । त्यस क्रममा साहले घटनापछि आफूले सुरुङभित्र रहेकाहरुलाई भगाएको तर आफू भाग्न नभ्याएको बताए ।

उनको बयान यस्तो छ:

मेरो नाम सञ्जय साह । म कन्ट्रोल रुममा अपरेटर काम गर्छु । अरू बेला त भित्र ४-५-६ जना मात्रै हुन्थ्यौं, त्यतिबेला चिहँ ४०-४५ जना नै थियौँ ।

म कन्ट्रोल रूममा भएकाले मेरो सबैको ज्यान बचाउनु मेरो जिम्मवारी थियो । त्यस्तो एक्सिडेन्ट भएपछि म एक्लै भागेर भएन, सबैलाई बचाउनु पर्यो । मैले सबैलाई भनेँ- ठूलो एक्सिडेन्ट भयो ड्याममा । अनि सबैलाई भाग्न लगाएँ बाहिर । त्यसो गर्दाखेरि मेरो टाइम गयो र लास्टमा म निस्किनै पाइनँ । अनि म फसेँ ।

४०-५० जना काम गरेकालाई भगाइयो । हाम्रो सम्पर्कमा रहेका र साथीहरुसँग कुरा भएका ३-४ जना मात्रै थियौँ, नजिक छेउछाउ कुरा गर्ने, हल्ला गर्ने । भित्रपट्टि पावर हाउसमा पनि मान्छेहरु हुन सक्छ होला । सबै भाग्न नसकेको होला । टनेल लामो छ । टनेलमा भए पनि त्यहाँ पानी फोर्सले भित्र लगिसक्या होला ।

सेनाका अधिकारीले उनलाई ९ दिनपछि बाहिर निस्किनु भनेको दोस्रो जीवन पाउनुजस्तै हो भन्दै बधाइ दिए । त्यसपछि साहले सोधे- आज कति… १९ गते हो ?

‘हो, १० गते छिरेको तपाईं’ भन्ने जवाफपछि उनले भने, ‘१० गते १० बजे एक्सिडेन्ट भा’थ्यो । हामी टाइम नोट गर्छौँ कन्ट्रोल रूममा । हामी महामन्त्र ईश्वर जप गर्दै थियौँ भित्र…। हरे कृष्ण… ।’