बेपता आयोगमा काम गर्न नियमावलीको अभाव छ : अध्यक्ष गड्तौला

काठमाडौं : बेपता पारिएका व्यक्तिको छानविन आयोगकी अध्यक्ष लीलादेवी गडतौलाले नियमावलीको अभावका कारण काममा गति दिन नसकिएको बताएकी छिन् ।

बिहीबार काठमाडौमा बेपता पारिएका व्यक्तिको छानविन आयोगले आयोजना गरेको कार्यक्रममा बोल्दै उनले आयोग फिल्डमा गइहाल्ने अवस्था नभएको भन्दै नियमावली नहुँदा कामको गति रोकिएको बताइन् ।

उनले भनिन्, ‘उपत्यका बाहिरका पीडितहरु छिटो गर्नुहोस भन्दै हुनुहुन्छ । तर नियमावलीका कारण कामले गति लिन सकेको छैन् । तुरुन्तै फिल्डमा गइहाल्ने अवस्था छैन । कार्यक्रमहरुको फरम्याट बनाउन सकिएको छैन । हाम्रो संयन्त्र कसरी परिचालन गर्ने भन्ने नै अन्योलता छ । यसमा सम्बन्धित निकायलाई घचघच्याइरहेका छौं ।’

उनले बेपत्ता पारिएका व्यक्तिको छानबिन आयोगको नियमावलीमा पहिले चार वर्ष कार्ययोजना बनाउने र पछि प्रत्येक वर्षको कार्ययोजना बनाउने बताइन् ।

उनले भनिन्, ‘कार्ययोजना पहिले चार वर्षको बनाउने हो अनि चार वर्षपछि प्रत्येक वर्षको बनाउनुपर्छ भन्ने छ । हामीले आफैंले आफैलाई बाँधेर अघि बढ्ने हो । आफैंले आफैंलाई बाधेनौं भने परिणाममा नपुग्न सक्छौ ।’ 

उनले बेपत्ता पारिएका व्यक्तिको छानबिन आयोग र सत्य निरुपण तथा मेलमिलाप आयोगबीच समन्वय गरी काम अघि बढाउनेपनि बताइन् ।