चक्रवात दित्वाहबाट श्रीलंकामा ३३० भन्दा बढीको मृत्यु, आपतकालीन अवस्था घोषणा

काठमाण्डौ, १५ मङ्सिर । श्रीलंकामा चक्रवात दित्वाहले देशमा विनाश मच्चाएपछि विनाशकारी बाढी र पहिरोबाट मृत्यु हुनेको संख्या ३३० भन्दा बढी पुगेको छ ।

श्रीलंकाको विपद् व्यवस्थापन केन्द्रका अनुसार २०० भन्दा बढी व्यक्ति बेपत्ता छन् र लगभग २० हजार घरहरू ध्वस्त भएका छन् । एक लाखभन्दा बढी मानिसहरू आश्रय लिन बाध्य भएका छन् । अहिले श्रीलंकाको लगभग एक तिहाइ भाग बिजुली वा पानी आपूर्तिबाट वञ्चित रहेको सरकारी अधिकारीहरुले बताएका छन् ।

चक्रवात दित्वाहको विनाशकारी प्रभावका कारण देशमा आपतकालीन अवस्था घोषणा गरिएको छ । राष्ट्रपति अनुरा कुमार दिसानायकेले यो देशको इतिहासको सबैभन्दा चुनौतीपूर्ण प्राकृतिक प्रकोप भएको र विनाशको हदले पुनर्निर्माणको अनुमान गर्न गाह्रो बनाएको बताएका छन् ।

सरकारले अन्तर्राष्ट्रिय सहयोगको लागि अपील गरेको छ र विदेशमा बस्ने श्रीलंकालीहरूलाई प्रभावित समुदायहरूलाई सहयोग गर्न आग्रह गरेको छ । चक्रवात दित्वाह शुक्रबार श्रीलंकाको पूर्वी तटमा पुगेको थियो तर त्यसपछि यो अगाडि बढेको छ ।