किमको उपस्थितिमा उत्तर कोरियाद्वारा दुई नयाँ क्षेप्यास्त्र परीक्षण

काठमाडौँ, ८ भाद्र । उत्तर कोरियाले दुई नयाँ हवाई रक्षा क्षेप्यास्त्र परीक्षण गरेको छ ।

उत्तर कोरियाको सरकारी सञ्चारमाध्यम केसीएनएका अनुसार, यो परीक्षण नेता किम जोङ-उनको निरीक्षणमा गरिएको थियो ।

केसीएनएले प्राविधिक विवरणहरू साझा नगरी यी हतियारहरूमा 'उत्कृष्ट लडाई क्षमता' छ र तिनीहरूमा 'विशेष प्रविधि' प्रयोग गरिएको उल्लेख गरेको छ ।

एजेन्सीले परीक्षणले दुवै क्षेप्यास्त्रहरू ड्रोन र क्रूज क्षेप्यास्त्रहरू सहित विभिन्न हवाई लक्ष्यहरूलाई नष्ट गर्न सक्षम रहेको दाबि गरेको छ ।

यो क्षेप्यास्त्र परीक्षण त्यस्तो समयमा गरिएको थियो जब दक्षिण कोरियाले मंगलबार सीमा पार गर्ने उत्तर कोरियाली सैनिकहरूमाथि चेतावनी गोली चलाएको थियो ।

योनहाप एजेन्सीका अनुसार, लगभग ३० उत्तर कोरियाली सैनिकहरूले केही समयको लागि गैऱ्ह-सैन्य क्षेत्र पार गरेपछि गोली चलाएको जनाएको छ ।