आठ महिनापछि विश्व तेल बजारमा मागभन्दा बढी आपूर्ति

काठमाडौं: अमेरिका–इरान युद्ध सुरु भएयता पहिलोपटक विश्व तेल बजारमा मागभन्दा आपूर्ति बढी भएको छ । अन्तर्राष्ट्रिय ऊर्जा एजेन्सी (आईईए) का अनुसार गत अक्टोबरमा विश्वव्यापी तेल आपूर्ति दैनिक करिब २० लाख ब्यारेलले खपतभन्दा बढी भएको हो ।

फाइनान्सियल टाइम्सका अनुसार मध्यपूर्वबाट तेल ढुवानीमा सुधार, अन्य उत्पादक राष्ट्रमा बढेको उत्पादन र विश्वव्यापी मागमा आएको कमीले बजारमा आपूर्ति बढेको हो । आईईएले यो वर्षको अन्तिम त्रैमासिक र आगामी वर्षभरि पनि तेल बजारमा आपूर्ति बढी रहने प्रक्षेपण गरेको छ ।

यससँगै कच्चा तेलको मूल्यमा समेत गिरावट आएको छ । अक्टोबरको सुरुवातमा प्रतिब्यारेल १३६ डलरसम्म पुगेको ब्रेन्ट कच्चा तेलको मूल्य घटेर करिब ९५ डलरमा झरेको छ ।

तर, आपूर्ति बढ्दैमा तत्काल बजार सामान्य अवस्थामा नफर्कने विश्लेषकहरूको चेतावनी छ । महिनौँसम्मको आपूर्ति अवरोधले घटेको तेल भण्डार पुनः पुरानै अवस्थामा पुर्‍याउन धेरै महिना लाग्नेछ । विशेषगरी डिजेल र हवाई इन्धनजस्ता प्रशोधित पेट्रोलियम पदार्थको मूल्य अझै उच्च छ ।

आईईएका अनुसार सन् २०२६ मा विश्वव्यापी तेल खपत दैनिक २७ लाख ब्यारेलले घट्ने र त्यसपछिको वर्ष पुनः २० लाख ब्यारेलले बढ्ने अनुमान छ ।