चीनको व्यापार बचत १० खर्ब डलर नाघ्यो, निर्यातमा नयाँ कीर्तिमान

चीनको व्यापार बचत (ट्रेड सरप्लस) यस वर्षको पहिलो १० महिनामै १० खर्ब अमेरिकी डलर नाघेको छ। चिनियाँ भन्सार प्रशासनका अनुसार निर्यात र आयातबीचको अन्तरले गत वर्षको कीर्तिमानलाई समेत उछिन्दै एक महिनाअघि नै नयाँ उपलब्धि हासिल गरेको हो।

सन् २०२६ को जनवरीदेखि अक्टोबरसम्म चीनको व्यापार बचत १.०४ ट्रिलियन डलर पुगेको छ। अक्टोबरमा मात्रै निर्यात गत वर्षको सोही अवधिको तुलनामा ३५.२ प्रतिशत र आयात ४१.६ प्रतिशतले बढेको छ।

विद्युतीय सवारीसाधन, सौर्य ऊर्जा उपकरण र कृत्रिम बौद्धिकता (एआई) सम्बन्धी पूर्वाधारका सामग्रीको विश्वव्यापी माग बढ्दा चिनियाँ निर्यातले गति लिएको हो। कम उत्पादन लागत, आधुनिक प्रविधि, स्वचालन र कमजोर चिनियाँ मुद्राले पनि अन्तर्राष्ट्रिय बजारमा उसका उत्पादन प्रतिस्पर्धी बनेका छन्।

यद्यपि, बढ्दो व्यापार बचतले चीनको आन्तरिक अर्थतन्त्रमा रहेको कमजोरीसमेत उजागर गरेको छ। घरजग्गा बजारको मन्दी र उपभोक्ताको घट्दो खर्चका कारण घरेलु माग कमजोर हुँदा आयात अपेक्षाकृत सीमित भएको विश्लेषण गरिएको छ।

चीनको बढ्दो निर्यातले युरोपेली मुलुकमा पनि चिन्ता बढाएको छ। विशेषगरी जर्मनी र फ्रान्सका उद्योगले चिनियाँ उत्पादनसँग प्रतिस्पर्धा गर्न कठिनाइ भोगिरहेका छन्, जसले औद्योगिक रोजगारीमा दबाब सिर्जना गरेको छ।