बैंकिङ क्षेत्रमा बढ्दो खराब कर्जा, प्रभु बैंक सबैभन्दा प्रभावित

काठमाडौं : वाणिज्य बैंकहरूमा खराब कर्जाको समस्या बढ्दै गएको छ । चालु आर्थिक वर्षको पहिलो त्रैमासिक वित्तीय विवरणअनुसार वाणिज्य बैंकहरूको औसत खराब कर्जा अनुपात ५.६४ प्रतिशत पुगेको छ ।

बैंकहरूले सार्वजनिक गरेको वित्तीय विवरणअनुसार गत आर्थिक वर्षको सोही अवधिको तुलनामा १३ वटा वाणिज्य बैंकको खराब कर्जा अनुपात बढेको छ भने ७ वटा बैंकको घटेको छ ।

चालु आर्थिक वर्षको असोज मसान्तसम्म सबैभन्दा बढी खराब कर्जा अनुपात प्रभु बैंकको देखिएको छ । बैंकको खराब कर्जा अनुपात १४.८० प्रतिशत पुगेको छ । गत वर्षको सोही अवधिमा यस्तो अनुपात ५.७८ प्रतिशत मात्रै थियो ।

त्यस्तै, एनआईसी एसिया बैंकको खराब कर्जा पनि उल्लेख्य रूपमा बढेको छ । गत वर्ष ६.९९ प्रतिशत रहेको बैंकको खराब कर्जा अनुपात यस वर्ष बढेर ९.८१ प्रतिशत पुगेको छ ।

नेपाल इन्भेष्टमेन्ट मेगा बैंकको खराब कर्जा अनुपात ८.८७ प्रतिशत पुगेको छ भने कुमारी बैंकको ८.७२ प्रतिशत र हिमालयन बैंकको ७.९८ प्रतिशत रहेको छ ।

यसैगरी, प्राइम कमर्सियल बैंकको खराब कर्जा अनुपात ७.१५ प्रतिशत, सिटिजन्स बैंकको ६.८० प्रतिशत र लक्ष्मी सनराइज बैंकको ५.५८ प्रतिशत पुगेको छ ।

बैंकहरूको खराब कर्जा अनुपातमा देखिएको वृद्धिले कर्जा असुली तथा बैंकिङ क्षेत्रको वित्तीय जोखिम व्यवस्थापनमा चुनौती थपिएको देखिन्छ ।