लक्ष्मीपूजाको साँझ विद्युत् मागले नयाँ रेकर्ड बनाउने अपेक्षा

काठमाडौं : यस वर्षको तिहारमा लक्ष्मीपूजाको साँझ विद्युत्को उच्चतम माग १ हजार ७ सय मेगावाट पुग्ने अनुमान गरिएको छ । नेपाल विद्युत् प्राधिकरणले लक्ष्मीपूजाका दिन विद्युत् खपत बढेर उक्त परिमाणमा पुग्ने प्रक्षेपण गरेको हो ।

गत वर्षको तुलनामा यस वर्ष विद्युत्को माग बढ्ने देखिएको छ । तिहारमा घर, कार्यालय तथा सार्वजनिक स्थानमा झिलिमिली बत्ती र विभिन्न विद्युतीय सामग्रीको प्रयोग बढ्ने भएकाले लक्ष्मीपूजाको साँझ विद्युत् खपत उच्च हुने गर्छ ।

नेपाल विद्युत् प्राधिकरणका कार्यकारी निर्देशक दीर्घायु कुमार श्रेष्ठका अनुसार यस वर्षको अनुमानित माग पूरा गर्न आन्तरिक विद्युत् उत्पादन नै पर्याप्त हुनेछ । उनका अनुसार लक्ष्मीपूजाको साँझ विद्युत् उत्पादन करिब २ हजार ५ सय मेगावाट पुग्ने अनुमान छ । मागभन्दा उत्पादन बढी हुने भएकाले विद्युत् आपूर्तिमा समस्या नआउने उनले बताएका छन् ।

पछिल्ला चार वर्षको तथ्यांक हेर्दा लक्ष्मीपूजाको साँझ विद्युत्को उच्चतम माग निरन्तर बढ्दै गएको देखिन्छ । २०७९ सालमा १ हजार ३०५ मेगावाट रहेको माग २०८० सालमा बढेर १ हजार ४३८ मेगावाट पुगेको थियो । त्यस्तै, २०८१ सालमा १ हजार ६०२ मेगावाट र २०८२ सालमा १ हजार ६५० मेगावाट पुगेको थियो ।

यस वर्ष प्राधिकरणले गरेको प्रक्षेपणअनुसार माग १ हजार ७०० मेगावाट पुग्नेछ । चार वर्षको अवधिमा लक्ष्मीपूजाको साँझ विद्युत्को उच्चतम माग करिब ४ सय मेगावाटले वृद्धि हुने देखिएको छ ।

तिहार तथा छठ पर्वलाई लक्षित गर्दै प्राधिकरणले विद्युत् उत्पादन, प्रसारण तथा वितरण प्रणालीलाई नियमित र व्यवस्थित बनाउने तयारी गरेको छ । पर्व अवधिभर प्राविधिक कर्मचारीलाई चौबीसै घण्टा तयारी अवस्थामा राखिने प्राधिकरणले जनाएको छ ।

विद्युत् आपूर्तिमा अवरोध हुन नदिन कार्यकारी निर्देशक श्रेष्ठले सम्बन्धित कार्यालय प्रमुखहरूलाई आवश्यक निर्देशन दिएका छन् । साथै, नो लाइट सेवामा प्राप्त हुने गुनासो तत्काल सम्बोधन गर्न र सम्भावित समस्या समाधानका लागि प्राविधिक टोली तयारी अवस्थामा राख्नसमेत निर्देशन दिइएको छ ।