भन्सार छली ल्याइएको २८ लाखको फूल खाल्डोमा पुरियो

काठमाडौँ : तिहार तथा छठ पर्वलाई लक्षित गरी भारतबाट अवैध रूपमा नेपाल भित्र्याइएका २८ लाख २७ हजार रुपैयाँभन्दा बढी मूल्यका विभिन्न प्रकारका फूल सशस्त्र प्रहरीले बरामद गरी नष्ट गरेको छ ।

सशस्त्र प्रहरी बलले झापा र धनुषाका विभिन्न सीमावर्ती क्षेत्रबाट भन्सार छली ल्याइएका सयपत्री, कमल र रजनिगन्धाका फूल बरामद गरेको हो ।

झापाको भद्रपुर नगरपालिका–८ देबीबस्तीबाट सशस्त्र प्रहरी नायव निरीक्षक अमरबहादुर भुजेलको कमान्डमा खटिएको टोलीले २२ लाख ६८ हजार ४ सय रुपैयाँ बराबरका ११ हजार ३४२ थान भारतीय सयपत्री माला तथा २ लाख ९५ हजार रुपैयाँ बराबरका १२ झोला कमलका फूल बरामद गरेको थियो । बरामद फूलको कुल मूल्य २५ लाख ६३ हजार ४ सय रुपैयाँ रहेको प्रहरीले जनाएको छ । उक्त फूल जनप्रतिनिधिको उपस्थितिमा खाल्डो खनी नष्ट गरिएको हो ।

त्यस्तै, धनुषाको देवडिहा र फुलगामा क्षेत्रबाट पनि अवैध रूपमा भित्र्याइएका फूल बरामद गरिएको छ । देवडिहाबाट १ लाख २४ हजार रुपैयाँ बराबरका सयपत्री र रजनिगन्धाका फूल बरामद गरी नष्ट गरिएको थियो । फुलगामा क्षेत्रमा तस्करहरूले छाडेर भागेका करिब १ लाख ४० हजार रुपैयाँ बराबरका २०० केजी सयपत्री फूलसमेत प्रहरीले बरामद गरेको थियो ।

ती फूलहरू स्थानीय जनप्रतिनिधि, नेपाल प्रहरी, भन्सार कार्यालयका प्रतिनिधि तथा स्थानीय बासिन्दाको रोहवरमा खाल्डो खनी नष्ट गरिएको सशस्त्र प्रहरीले जनाएको छ ।

नेपाली किसानले उत्पादन गरेका स्थानीय फूलको प्रवर्द्धन तथा अवैध आयात नियन्त्रण गर्ने उद्देश्यले सीमा क्षेत्रमा निगरानी थप कडा बनाइएको सशस्त्र प्रहरीले जनाएको छ ।