भाटभटेनी तंग्रिँदै, कोटेश्वर शाखामा विशेष पूजासहित पुन: सुरुवात

काठमाडौँ: देशभर आफ्नो व्यापारिक सञ्जाल विस्तार गरेको नेपालको ठुलो रिटेल चेन भाटभटेनी सुपरमार्केटको कोटेश्वर शाखा आजदेखि पुन: सञ्चालनमा आएको छ। गत भदौमा भएको 'जेनजी' आन्दोलनका क्रममा क्षति पुगेको यस स्टोरलाई मर्मतसम्भार र पुनर्निर्माणपछि नयाँ स्वरूपमा सञ्चालनमा ल्याइएको हो।

बुधबार बिहान कोटेश्वर शाखामा आयोजित एक विशेष समारोहका बीच भाटभटेनीका अध्यक्ष मीनबहादुर गुरुङको उपस्थितिमा श्रीमद्भागवत पाठपारायण एवं लक्षवर्ती (एक लाख बत्ती) प्रज्वलन गरी स्टोरको पुन: उद्घाटन गरियो।

भाटभटेनीले यो पुन: सुरुवातलाई 'ताजा सुरुवात र बलियो संकल्प' को रूपमा व्याख्या गरेको छ। भाटभटेनीले आफ्नो सामाजिक संजालमा लेखेको छ, "कोटेश्वर भाटभटेनी ताजा सुरुवात र बलियो भावनाका साथ फेरि उठिरहेको छ। यो पूजा केवल एक अनुष्ठान मात्र नभई एकता, साहस र सँगै अगाडि बढ्ने एउटा सम्झना हो।"

देशभर चेन निर्माण गरेर व्यापारमा विविधीकरण गर्दै आएको भाटभटेनी सुपरमार्केटमाथि गत भदौ महिनामा भएको आन्दोलनका क्रममा ठुलो भौतिक आक्रमण भएको थियो। सो क्रममा भाटभटेनीका १२ वटा स्टोर पूर्ण रूपमा जलाइएको थियो भने ९ वटा स्टोरमा आंशिक क्षति पुगेको थियो।

भाटभटेनीका अध्यक्ष मीनबहादुर गुरुङले प्रधानमन्त्री सुशीला कार्कीसँगको भेटमा आन्दोलनका कारण कुल १० अर्ब ८५ करोड बराबरको क्षति भएको विवरण पेस गरेका थिए।

आफ्ना व्यापारिक प्रतिष्ठानहरूमा भएको ठुलो क्षतिका बाबजुद भाटभटेनीले आफ्ना संरचनाहरूलाई पुन: सञ्चालनमा ल्याउने कामलाई तीव्रता दिएको छ। सोही अभियान अन्तर्गत आज कोटेश्वर शाखा सञ्चालनमा आएको हो।