भारतको बजेट २०२६: नेपाललाई ८ सय करोड भारु अनुदान दिने

काठमाडौँ: भारत सरकारले आगामी आर्थिक वर्ष २०२६/२७ का लागि नेपाललाई ८ सय करोड भारतीय रुपैयाँ (करिब १२ अर्ब ८० करोड नेपाली रुपैयाँ) अनुदान दिने घोषणा गरेको छ। भारतीय अर्थमन्त्री निर्मला सीतारमणले आइतबार संघीय संसद्‌मा प्रस्तुत गरेको वार्षिक बजेटमा नेपालका लागि उक्त रकम विनियोजन गरिएको हो।

यो अनुदान रकम गत आर्थिक वर्षको सुरुवाती विनियोजन बराबर नै हो। गत वर्ष पनि भारतले नेपाललाई ८ सय करोड भारु नै छुट्याएको थियो, जसलाई पछि संशोधन गरेर ८ सय ३० करोड पुर्‍याइएको थियो।

भारतले आफ्ना छिमेकी मुलुकहरूमध्ये सबैभन्दा बढी अनुदान भुटानलाई दिने भएको छ। भुटानका लागि यसपटक २ हजार २ सय ८८ करोड भारु विनियोजन गरिएको छ, जुन गत वर्षको तुलनामा बढी हो। अन्य छिमेकी देशहरूमा माल्दिभ्सलाई ५ सय ५० करोड, श्रीलंकालाई ४ सय करोड र म्यानमारलाई ३ सय करोड भारु अनुदान दिइने बजेटमा उल्लेख छ। यस्तै, बंगलादेशलाई ६० करोड र अफगानिस्तानलाई १ सय ५० करोड भारु दिने भारतको योजना छ।