ऊर्जा क्षेत्रका मुद्दा उठाउन भरत पराजुली चुनावी मैदानमा, इप्पानको नैतिक समर्थन

काठमाडौं: स्वतन्त्र ऊर्जा उत्पादकहरूको संस्था, नेपाल (इप्पान) का कार्यसमिति सदस्य एवं राष्ट्रिय स्वतन्त्र पार्टी (रास्वपा) का नेता भरत पराजुलीले ऊर्जा क्षेत्रका समस्या समाधानका लागि आफू संसदीय निर्वाचनमा होमिएको बताएका छन् । 

सिन्धुपाल्चोक क्षेत्र नं. १ बाट प्रतिनिधिसभा सदस्यका उम्मेदवार रहेका पराजुलीले मंगलबार इप्पानद्वारा आयोजित एक कार्यक्रममा बोल्दै यस्तो धारणा राखेका हुन् ।

पराजुलीले नेपालको समृद्धिको आधार मानिएको ऊर्जा क्षेत्र चौतर्फी आक्रमणमा परेको भन्दै संसदमा यसको समाधानका लागि बहस पैरवी गर्ने प्रतिबद्धता जनाए । विगतमा १३ वटा ठूला उद्योगको लाइन काटिँदा ४० हजारको रोजगारी प्रभावित भएको र ५०० मेगावाट विद्युत् खेर गएको स्मरण गराउँदै उनले भने, "म १३ लाख उद्योग स्थापना हुने वातावरण बनाउन र लाखौँ नेपालीलाई स्वदेशमै रोजगारी दिलाउन राजनीतिमा आएको हुँ । राजनीतिमा देखिएको फोहोर सफा गर्न म आफैँ मैदानमा उत्रिएको छु ।"

पराजुलीको उम्मेदवारीलाई इप्पानले समेत नैतिक समर्थन गरेको छ । इप्पानका अध्यक्ष गणेश कार्कीले ऊर्जा क्षेत्र बुझेका व्यक्तिहरू संसदमा पुग्नुपर्ने आवश्यकता औँल्याउँदै पराजुलीलाई सहयोग गर्ने बताए । यस्तै, वरिष्ठ उपाध्यक्ष मोहनकुमार डाँगी र महासचिव बलराम खतिवडाले पनि ऊर्जा उद्यमीहरू प्रत्यक्ष राजनीतिमा आएर नीतिगत तहमा हस्तक्षेप गर्नुपर्नेमा जोड दिए ।