नेपाल कबड्डी लिग शुक्रबारदेखि, प्रि–म्याच कन्फ्रेन्समा सबै उत्साहित

काठमाडौं: नेपाल कबड्डी लिग (एनकेएल) शुक्रबारबाट काठमाडौंमा सुरु हुँदैछ ।

बिहीबार दशरथ रंगशालामा प्रतियोगिता अघि आयोजित प्रि–म्याच कन्फ्रेन्समा सबै लिगका प्रशिक्षक तथा खेलाडीहरुले तयारी राम्रो भएको र उत्साहित रहेको बताएका छन् । 

उदघाटन खेलमा शुक्रबार काठमाडौं माभरिक्स र पोखरा लेकर्सबीच प्रतिष्पर्धा हुने जनाइएको छ ।

फ्रेन्चाइज टिमको अवधारणामा आयोजित प्रतियोगिता राउन्ड रोबिन लिग र नकआउट चरण गरी माघ १८ गतेसम्म चल्ने आयोजक एस्ट्रोनिक्स म्यानेजमेन्टले जनाएको छ । 

प्रतियोगितामा ६ टिमको सहभागीता रहने छ । जसमा विराटनगर ब्यान्डिट्स, जनकपुर नाइट्स, काठमाडौं माभरिक्स, पोखरा लेकर्स, हिमालयन रेइडर्स (बुटवल) र धनगढी वाइल्डक्याट्स रहेका छन् ।

राउन्ड रोबिन लिगको शीर्ष चारमा रहने टिम नकआउट चरणमा प्रवेश गर्नेछन् भने इलिमिनेटर र क्वालिफायरपछि फाइनल खेल्ने दुई टिमको टुंगो लाग्नेछ ।