नवनियुक्त आइजिपी मनोज केसी गृह मन्त्रालयमा, आजै पदभार सम्हाल्न आग्रह

काठमाडौँ : मन्त्रिपरिषद् बैठकबाट नेपाल प्रहरीको महानिरीक्षक (आइजिपी) मा नियुक्त भएका डा. मनोजकुमार केसीलाई गृह मन्त्रालयले आजै पदभार ग्रहण गर्न आग्रह गरेको छ ।

नियुक्ति निर्णयलगत्तै केसीलाई गृह मन्त्रालय बोलाइएको हो । मन्त्रालय स्रोतका अनुसार उनलाई प्रदान गरिने नियुक्तिपत्रसमेत तयार भइसकेको छ । मन्त्रालयले नियुक्तिपत्र बुझ्दै दर्ज्यानी चिह्न (फुली) लगाएर आजै पदबहाली गर्न अनुरोध गरिरहेको छ ।

तर धार्मिक विधि पूरा गर्नुपर्ने भएकाले केसीले भने बिहीबार मात्रै पदभार सम्हाल्ने इच्छा व्यक्त गरेका छन् । समाचार तयार पार्दासम्म उनी गृहमन्त्री सुधन गुरुङ र गृहसचिव केदारनाथ शर्मासँग मन्त्रालयमा छलफलमा रहेका छन् ।

केसीसँगै रहेका उनका स्टाफ अफिसर प्रहरी निरीक्षक धर्मराज जोशीले आफूहरू तयारी अवस्थामा रहेको बताएका छन् । उता, प्रहरी प्रधान कार्यालयमा पनि नवनियुक्त आइजिपीको सम्भावित पदबहालीलाई लक्षित गर्दै प्रहरी अधिकृतहरू तयारी अवस्थामा रहेको स्रोतले जनाएको छ ।

मन्त्रालयले आजै नियुक्तिपत्र बुझेर दर्ज्यानी चिह्न लगाउन आग्रह गरे पनि नियुक्तिपत्र बुझिसकेपछि दर्ज्यानी चिह्न अर्को दिन लगाएसमेत महानिरीक्षकका रूपमा जिम्मेवारी सम्हाल्न सकिने बताइएको छ ।