राष्ट्रियसभामा दलको नेताको परिवर्तन शुभ संकेत होइन- पूर्णबहादुर खड्का

काठमाण्डौ, १७ वैशाख । नेपाली काँग्रेसका नेता पूर्णबहादुर खड्काले राष्ट्रियसभामा दलको नेताको परिवर्तन शुभ संकेत नभएको टिप्पणी गरेका छन् ।

खड्काले सामाजिक सञ्जालमा लेख्दै मनोनयन र परिवर्तन गर्ने अधिकार संसदीय दलको विधानअनुसार दलको नेतालाई नै रहेको भएपनि देशको राष्ट्रियतामाथि संकटको कालो बादल मडारिरहेको र पार्टी भित्रै विवाद बढेर मन विभाजित भएको अवस्थामा एकताको पहल गर्नुपर्ने अवस्थमा कुनै सुचना बिना नेता परिवर्तन गरिनु शुभ संकेत नभएको बताएका हुन् ।

खड्काले पार्टीका एक अनुभवी तथा अग्रज नेतालाई सामान्य राजनीतिक शिष्टाचारसमेत नराखी पूर्व जानकारी बिना नै अचानक हटाउने निर्णय गरिएको जानकारी पाउँदा आफू स्तब्ध भएको बताएका छन् ।

उनले काँग्रेसको एकताको अपरिहार्य आवश्यकता रहेको ऐतिहासिक संवेदनशील घडीमा यस्तो हतारको निर्णय शुभ संकेत नभएको जिकिर गरेका छन् ।