शेर्पा पोशाकको पहिरनलाई लिएर कोप–३१ मा मन्त्री चौधरी विवादित

काठमाडौँ : टर्कीको अन्ताल्यामा जारी संयुक्त राष्ट्रसंघीय जलवायु परिवर्तन सम्मेलन (कोप–३१) मा सहभागी कृषि, वन तथा वातावरणमन्त्री गीता चौधरी शेर्पा समुदायको परम्परागत पोशाकको पहिरनलाई लिएर विवादमा परेकी छन् । उनले शेर्पा समुदायको परम्परागत पोशाक उल्टोपाल्टो तथा नमिलेको ढंगले लगाएको भन्दै सामाजिक सञ्जालमा आलोचना भएको हो ।

राष्ट्रिय आदिवासी जनजाति महिला महासंघकी बागमती प्रदेश अध्यक्ष छिरिङ डोल्मा शेर्पाले फेसबुकमार्फत मन्त्री चौधरीको पहिरनप्रति गम्भीर आपत्ति जनाएकी छन् । उनले सम्बन्धित समुदायसँग आवश्यक परामर्श नगरी हिमाली क्षेत्रको मौलिक पोशाकलाई गलत ढंगले प्रस्तुत गरिएको आरोप लगाएकी छन् ।

शेर्पाले मन्त्री चौधरीको उक्त पहिरनलाई ‘हिमाली मुद्दा उठाएको नभई हिमाली जातिलाई जिस्क्याएको’ टिप्पणी गरेकी छन् । उनले कोप–३१ मा विभिन्न देशका प्रतिनिधिले उक्त तस्बिर हेर्दा शेर्पा समुदायको परम्परागत पहिरनबारे गलत सन्देश जान सक्ने भन्दै प्रश्न उठाएकी छन् ।

उनले सगरमाथा आरोहणमार्फत नेपाललाई विश्वमाझ चिनाउँदै आएको शेर्पा समुदायको सांस्कृतिक पहिचानमाथि खेलबाड गर्न नहुने बताएकी छन् । हिमालको मुद्दा उठाउन शेर्पा समुदायको पोशाक लगाउनैपर्ने आवश्यकता नरहेको भन्दै मन्त्रीकै हैसियतमा हिमाली विषय उठाउन सकिने उनको भनाइ छ ।

शेर्पाले सामाजिक सञ्जालमा ‘पहिरन भनेको पहिचान हो’ भन्दै सांस्कृतिक पहिचानको सम्मान गर्न आग्रह गरेकी छन् । साथै, उनले मन्त्री चौधरीले यस विषयमा सार्वजनिक रूपमा माफी माग्नुपर्ने मागसमेत गरेकी छन् ।

सार्वजनिक भएको तस्बिरमा मन्त्री चौधरीले शेर्पा महिलाले कम्मरमा बाँध्ने परम्परागत धर्के एप्रोन (पाङदेन) उल्टो तथा छोटो पारेर लगाएको र आङ्गीमाथि आधुनिक कोट लगाएको देखिन्छ । यही पहिरनलाई लिएर अहिले सामाजिक सञ्जालमा विभिन्न टीकाटिप्पणी भइरहेका छन् ।