व्यक्तिगत कीर्तिमानीभन्दा टिमको जित महत्वपूर्ण : सन्दीप लामिछाने

काठमाडौँ: विराटनगर किंग्सका कप्तान सन्दीप लामिछानेले व्यक्तिगत कीर्तिमानभन्दा टिमको जितलाई बढी महत्त्व दिएको बताएका छन् ।

पोखरा एभेन्जर्सलाई ६ विकेटले पराजित गरेपछि प्रतिक्रिया दिँदै लामिछानेले प्रतियोगितामा टिमका लागि महत्त्वपूर्ण दुई अङ्क जोड्नु आफ्नो मुख्य लक्ष्य रहेको बताए । पोखराविरुद्धको खेलमा ह्याट्रिकसहित ६ विकेट लिएका उनले व्यक्तिगत उपलब्धिभन्दा टिमको जित नै महत्त्वपूर्ण हुने धारणा राखे ।

ह्याट्रिक पूरा गरेको कुरा आफूलाई तत्काल थाहा नभएको पनि उनले बताए । टिमका साथीहरूले जानकारी गराएपछि मात्रै ह्याट्रिक भएको थाहा पाएको उनको भनाइ थियो ।

लामिछानेका अनुसार बलरले कति विकेट लियो भन्नेभन्दा पनि खेलको कुन परिस्थिति र समयमा बलिङ गर्‍यो भन्ने कुरा बढी महत्त्वपूर्ण हुन्छ । अर्को इन्डबाट अन्य बलरले पनि दबाब सिर्जना गरेकाले आफूलाई बलिङ गर्न सहज भएको उनले बताए ।

साथै, अन्य खेलाडीको योगदानले आफ्नो प्रदर्शनलाई प्रभावकारी बनाउन सहयोग गरेको उल्लेख गर्दै उनले पोखराविरुद्धको जितलाई उत्कृष्ट सामूहिक प्रदर्शनको उदाहरणका रूपमा प्रस्तुत गरे ।