जनप्रिय क्याम्पसद्वारा पुँजी बजार साक्षरता तथा लगानीकर्ता अभिवृद्धि कार्यक्रम सम्पन्न

पोखरा, २२ असोज । विश्व लगानीकर्ता सप्ताह २०२६ (World Investor Week: WIW 2026) को अवसरमा रोडसो सेक्युरिटीज लिमिटेड (स्टक ब्रोकर नं. ९२), पोखरा शाखाले जनप्रिय बहुमुखी क्याम्पसमा व्यवस्थापन संकायमा अध्ययनरत विद्यार्थीहरूका लागि “पुँजी बजार साक्षरता एवं लगानीकर्ता अभिवृद्धि कार्यक्रम” सम्पन्न गरेको छ ।

नेपाल धितोपत्र बोर्ड (SEBON) नेपाल धितोपत्र नियमन निकायहरूको अन्तर्राष्ट्रिय संगठन (International Organization of Securities Commissions: IOSCO) सँग आबद्ध रहेको सन्दर्भमा IOSCO को आह्वानमा प्रत्येक वर्ष विश्वभर सञ्चालन हुँदै आएको विश्व लगानीकर्ता सप्ताह अन्तर्गत नेपालमा पनि अश्विन १९ देखि २५ गतेसम्म लगानी सप्ताह मनाईरहेको छ । यसमा लगानीकर्ता शिक्षा, वित्तीय साक्षरता तथा वित्तीय सचेतनामूलक विभिन्न कार्यक्रमहरू सञ्चालन हुँदै आएका छन् । सोही अभियानअन्तर्गत रोडसो सेक्युरिटिज लिमिटेडले २०८३ असोज २० गते आयोजित कार्यक्रममा जनप्रिय बहुमुखी क्याम्पसमा व्यवस्थापन संकायको चौथो वर्षमा अध्ययनरत ५५ जना विद्यार्थीहरूको उत्साहजनक सहभागिता रहेको थियो ।

कार्यक्रममा जनप्रिय बहुमुखी क्याम्पसका सहायक क्याम्पस प्रमुख श्री नवीनराज खनाल प्रमुख अतिथिका रूपमा उपस्थित थिए । कार्यक्रमको अध्यक्षता रोडशो सेक्युरिटीज लिमिटेडका उपप्रमुख कार्यकारी अधिकृत (DCEO) श्री विष्णु प्रसाद सापकोटाले गरेका थिए । कार्यक्रममा उक्त क्याम्पसका प्राध्यापक श्री टंक राज बराल अतिथिका रूपमा उपस्थित थिए भने कार्यक्रममा संस्थाका कर्मचारी क्षितिजा विश्वकर्मा, निर्मल रानाभाट र योगेश उपाध्यको पनि उपस्थिति थियो । उक्त कार्यक्रमको सञ्चालन तथा सहजीकरण रोडशो सेक्युरिटीज लिमिटेड, पोखरा शाखाका शाखा प्रबन्धक श्री विवेक पराजुलीले गरेका थिए ।

सीमित स्रोतको विवेकपूर्ण उपयोग र लगानी निर्णयमा जोड:

प्रमुख अतिथि श्री नवीनराज खनालले विद्यार्थीहरूलाई वित्तीय स्रोतको महत्व, पुँजी बजारका सम्भावना तथा लगानी गर्दा आवश्यक पर्ने ज्ञान, अनुसन्धान र विवेकपूर्ण निर्णय क्षमताबारे जानकारी गराउँदै कार्यक्रम अर्थपूर्ण र उपयोगी रहेको बताए ।

उनले विद्यार्थी जीवनदेखि नै वित्तीय ज्ञान तथा लगानीसम्बन्धी व्यावहारिक बुझाइ विकास गर्न आवश्यक रहेको उल्लेख गर्दै यस्ता कार्यक्रमले कक्षाकोठामा प्राप्त सैद्धान्तिक ज्ञानलाई व्यावहारिक पक्षसँग जोड्न महत्वपूर्ण भूमिका खेल्ने बताए । कार्यक्रम आयोजना गरेकोमा आयोजकप्रति धन्यवाद व्यक्त गर्दै उनले आगामी दिनमा समेत यस्ता कार्यक्रमलाई निरन्तरता दिन शुभकामना व्यक्त गरे ।

कार्यक्रममा “पैसाको मूल्य बुझेको मानिसले विवेकपूर्ण लगानी तथा Rational Decision गर्न सक्छ” भन्ने अवधारणालाई विशेष जोड दिइएको थियो । पुँजी बजारमा लगानी गर्नुअघि बजारको अध्ययन, उपलब्ध अवसरको अनुसन्धान तथा पर्याप्त ज्ञान हासिल गर्नुपर्ने विषयमा विद्यार्थीहरूलाई अभिमुखीकरण गरिएको थियो ।

पुँजी बजार पैसा छाप्ने मेसिन होइन : डिसिइओ सापकोटा

कार्यक्रमका अध्यक्ष तथा रोडशो सेक्युरिटीज लिमिटेडका उपप्रमुख कार्यकारी अधिकृत (DCEO) श्री विष्णु प्रसाद सापकोटाले पुँजी बजारलाई केवल तत्काल नाफा कमाउने माध्यमका रूपमा बुझ्न नहुने बताए । उनले पुँजी बजार “पैसा छाप्ने मेसिन” नभई ज्ञान, अनुसन्धान, जोखिम व्यवस्थापन, अनुशासन र विवेकपूर्ण निर्णयमा आधारित वित्तीय बजारको संयन्त्र (Mechanism) भएको उल्लेख गरे ।

लगानीमा प्रतिफल प्राप्त गर्ने सम्भावनासँगै जोखिम पनि रहने भएकाले हल्ला, सामाजिक सञ्जालमा फैलिएका अपुष्ट सूचना, भावनात्मक निर्णय वा तत्कालीन लाभको अपेक्षाभन्दा तथ्य, अध्ययन, अनुसन्धान र आफ्नो जोखिम वहन क्षमताका आधारमा लगानीसम्बन्धी निर्णय गर्नुपर्ने उनले बताए ।

उनले विद्यार्थीहरूलाई पुँजी बजारलाई अवसरका रूपमा हेर्दा पनि त्यसको प्रकृति, जोखिम र सम्भावित प्रतिफललाई बुझेर मात्र अघि बढ्न आग्रह गरे । ज्ञान र अनुशासनबिनाको लगानीभन्दा अध्ययन र अभ्यासमा आधारित निर्णय नै दीर्घकालीन रूपमा प्रभावकारी हुने उनको भनाइ थियो ।

वास्तविक पैसा गुमाएर मात्र सिक्नुपर्दैन:

कार्यक्रमका प्रस्तोता तथा रोडशो सेक्युरिटीज लिमिटेड, पोखरा शाखाका शाखा प्रबन्धक श्री विवेक पराजुलीले पुँजी बजारसम्बन्धी ज्ञान तथा व्यावहारिक अनुभव हासिल गर्न आफ्नै वास्तविक पैसा गुमाएर मात्र सिक्नुपर्छ भन्ने आवश्यक नरहेको विषयमा विद्यार्थीहरूलाई जानकारी गराए ।

उनले सीमित स्रोतसाधनको विवेकपूर्ण उपयोग गर्दै बजारको अध्ययन, अभ्यास, कारोबारको अभिलेखीकरण तथा जोखिमरहित अभ्यासमार्फत पनि लगानीसम्बन्धी व्यावहारिक ज्ञान हासिल गर्न सकिने बताए ।

यसले विद्यार्थी तथा नयाँ लगानीकर्तालाई वास्तविक पूँजी प्रयोग गर्नुअघि आफ्नो निर्णय क्षमता, लगानी रणनीति तथा अनुशासन परीक्षण गर्ने अवसर प्रदान गर्ने उनले उल्लेख गरे ।

कार्यक्रमपश्चात् विद्यार्थीहरूलाई Trade Journal तथा Paper Trading का नमुना (Format) समेत वितरण गरिएको थियो, जसबाट उनीहरूले वास्तविक लगानी नगरी कारोबार अभिलेख राख्ने तथा काल्पनिक रकममार्फत बजार अभ्यास गर्ने तरिका बुझ्न सक्ने अपेक्षा गरिएको थियो ।

प्रारम्भिक चरणका लगानीकर्ता तथा ट्रेडरलाई कारोबारमा अनुशासन विकास गर्न तथा FOMO, Fear र Greed जस्ता भावनात्मक प्रभावका कारण हुने निर्णयगत कमजोरी पहिचान गर्न सहयोग पुर्‍याउनुका साथै केही अनुभव हासिल गरेका Intermediate Traders का लागि आफ्नो Trading Strategy, Win Rate, Risk-Reward Ratio तथा समग्र Performance को विश्लेषण गरी आवश्यक सुधार गर्न Trade Journal उपयोगी हुने उदेश्यले बिद्यार्थीलाई उपलब्ध गराईएको थियो ।

नियमित रूपमा कारोबारको अभिलेख राख्दा व्यक्तिगत अनुभवलाई अनुमान वा भावनामा आधारित निष्कर्षका रूपमा नभई तथ्यमा आधारित सिकाइ र सुधारको आधारका रूपमा विकास गर्न सकिने विषयमा समेत जोड दिइएको थियो।

सैद्धान्तिक ज्ञानलाई व्यवहारमा रूपान्तरण गर्ने अवसर:

व्यवस्थापन विषय अध्ययन गरिरहेका विद्यार्थीहरूका लागि व्यवस्थापन, वित्त, जोखिम तथा निर्णय प्रक्रियासम्बन्धी सैद्धान्तिक ज्ञानलाई व्यावहारिक वित्तीय निर्णयमा कसरी प्रयोग गर्न सकिन्छ भन्ने विषयमा कार्यक्रम केन्द्रित रहेको थियो ।

विद्यार्थीहरूलाई पुँजी बजारलाई केवल शेयर खरिद-बिक्रीको माध्यमका रूपमा मात्र नभई ज्ञान, अनुसन्धान, जोखिम व्यवस्थापन, अनुशासन र विवेकपूर्ण निर्णय आवश्यक पर्ने वित्तीय बजारको संयन्त्रका रूपमा बुझ्न प्रेरित गरिएको थियो । पुँजी बजारमा अवसर भए पनि त्यसलाई निश्चित प्रतिफल वा तत्काल आम्दानीको माध्यमका रूपमा लिन नहुने र अवसरसँगै जोखिमको मूल्याङ्कन गर्नु नै जिम्मेवार लगानीको आधार भएको विषयमा समेत जोड दिइएको थियो ।

साथै, विद्यार्थीहरूलाई सुरक्षित तथा सुशिक्षित लगानी गर्न र भविष्यमा उपलब्ध हुन सक्ने स्टक मार्केट अवसरहरु तथा पुँजी बजारसँग सम्बन्धित सम्भावनाबारे जानकारी प्रदान गर्दै आफ्नो सीमित स्रोतसाधन, समय र ज्ञानलाई व्यवस्थित रूपमा प्रयोग गरी वित्तीय निर्णय क्षमता विकास गर्न प्रोत्साहित गरिएको थियो । कार्यक्रमले विद्यार्थीहरूमा पुँजी बजार, लगानी प्रक्रिया, जोखिम व्यवस्थापन तथा वित्तीय अनुशासनसम्बन्धी आधारभूत ज्ञान अभिवृद्धि गर्न महत्वपूर्ण योगदान पुर्‍याएको आयोजकको विश्वास रहेको छ ।

आयोजकद्वारा आभार तथा शुभकामना व्यक्त:

कार्यक्रममा उत्साहजनक सहभागिता जनाउने सम्पूर्ण विद्यार्थीहरू, जनप्रिय बहुमुखी क्याम्पस प्रशासन तथा सम्बन्धित समितिप्रति रोडशो सेक्युरिटीज लिमिटेड परिवारले हार्दिक धन्यवाद तथा विशेष आभार व्यक्त गरेको छ । आगामी दिनहरूमा पनि विद्यार्थी, युवा तथा सर्वसाधारणमा वित्तीय साक्षरता, लगानीकर्ता शिक्षा तथा सुरक्षित, अनुशासित र जिम्मेवार लगानी संस्कृतिको विकास गर्ने उद्देश्यले यस्ता कार्यक्रमहरूलाई निरन्तरता दिने प्रतिबद्धता आयोजकले व्यक्त गरेको छ। यस अवसरमा हिन्दू धर्मावलम्बीहरूको महान् पर्व बडा दशैं, शुभ दीपावली तथा नेपाल संवत्को हार्दिक मंगलमय शुभकामना समेत व्यक्त गरिएको थियो ।

रोडसो सेक्युरिटीज लिमिटेड (स्टक ब्रोकर नं. ९२) को प्रधान कार्यालय बागदरबार, काठमाडौंमा रहेको छ भने पोखरा शाखा न्युरोड–०९, पोखरा, अर्बिन्द कम्प्लेक्समा सञ्चालनमा रहेको छ।